संदीप नागरे, हिंगोली

पुण्यातील काँग्रेसचे नेते आणि माजी आमदार रवींद्र धंगेकर यांनी काँग्रेसचा हात सोडत शिवसेना शिंदे गटामध्ये प्रवेश करत धनुष्यबाण हाती घेतलं. रवींद्र धंगेकरांनी एकनाथ शिंदे यांच्या शिवसेनेत प्रवेश करत काँग्रेसला मोठा धक्का दिला. रवींद्र धंगेकर यांच्या शिंदे गटातील प्रवेशानंतर आता काँग्रेसला मराठवाड्यामध्ये मोठा धक्का बसला आहे. मराठवाड्यातील काँग्रेसचा बडा नेता शिंदे गटाच्या वाटेवर असून लवकरच त्यांचा पक्षप्रवेश देखील होणार आहे.

शिंदे गट 'मिशन टायगर'च्या माध्यमातून महाविकास आघाडीला एकापाठोपाठ एक धक्के देत आहे. महाविकास आघाडीच्या अनेक बड्या नेत्यांसह पदाधिकाऱ्यांनी शिंदे गटामध्ये प्रवेश केले आहेत. शिंदे गटामध्ये इनकमिंग अजूनही सुरूच आहे. नुकताच काँग्रेसचे माजी आमदार रवींद्र धंगेकर यांनी उपमुख्यमंत्री एकनाथ शिंदे यांच्या उपस्थितीमध्ये शिंदे गटामध्ये प्रवेश केला. त्यांच्यानंतर आता पुन्हा एकदा शिवसेनेनं मराठवाड्यात काँग्रेसला दुसरा धक्का दिला आहे.

हिंगोली विधानसभेत काँग्रेसकडून सलग ३ वेळा आमदार राहिलेले काँग्रेसचे नेते भाऊराव पाटील गोरेगावकर आपल्या हजारो समर्थकांसह शिवसेना शिंदे गटामध्ये प्रवेश करणार आहेत. लवकरच हिंगोलीमध्ये गोरेगावकर यांचा पक्षप्रवेश सोहळा देखील पार पडणार असल्याची माहिती शिवसेनेसह गोरेगावकरांच्या समर्थकांनी दिली आहे. या पक्षप्रवेश सोहळ्याला स्वतः एकनाथ शिंदे उपस्थित राहणार असल्याची माहिती समोर आली आहे.

दरम्यान, २०२४ च्या विधानसभा निवडणुकीत काँग्रेसकडून भाऊराव पाटील गोरेगावकर यांची उमेदवारी निश्चित झाली असताना अचानक उद्धव ठाकरेंनी हिंगोली विधानसभेची जागा सोडून घेत रूपाली पाटील गोरेगावकरांना महाविकास आघाडीकडून उमेदवारी दिली होती. उमेदवारी न मिळाल्याने नाराज झालेल्या गोरेगावकर यांनी पक्षाच्या विरोधात बंडखोरी करत अपक्ष उमेदवारी अर्ज दाखल करत बंडखोरी केली होती. मात्र या निवडणुकीत रूपाली पाटील गोरेगावकरांसह भाऊराव पाटील गोरेगावकर यांचा देखील पराभव झाला होता.