Maharashtra Minister Manikrao Kokate press conference Live : ऑनलाइन गेम खेळताना व्हिडिओ व्हायरल झाल्यानंतर माणिकराव कोकाटे यांच्या कृषीमंत्रिपदाचा राजीनामा मागण्यात आला होता. त्यावर माणिकराव कोकाटे यांनी स्पष्टीकरण दिले. मला रमी खेळताच येत नाही. तसे आढळले तर मी राजीनामा देण्यास तयार असल्याचे कोकाटे यांनी पत्रकार परिषदेत सांगितले. त्याशिवाय राजीनाम्याच्या मागणीवर कोकाटे म्हणले तितका मोठा विषय आहे का? राजीनामा द्यायला मी काय विनयभंग केला आहे का? असा सवालही त्यांनी उपस्थित केला. विधानभवनात काय करायचं, ते मला चांगलेच कळते, असेही कोकाटे म्हणाले.

नाशिक येथे पत्रकार परिषदेत माणिकराव कोकाटे बोलत होते. विधिमंडळात ऑनलाइन गेम खेळतानाचा व्हिडिओ व्हायरल झाल्यानंतर राज्यातील राजकारण तापले होते. त्यानंतर माणिकराव कोकाटे यांच्या राजीनाम्याच्या मागणीने जोर धरला होता. माणिकराव कोकाटे यांच्या या व्हिडिओवरून मुख्यमंत्री देवेंद्र फडणवीस आणि सुनील तटकरे यांनी नाराजी व्यक्त केली होती. त्याशिवाय अजित पवार यांनी त्यांच्याशी फोनवर चर्चा केली होती. विरोधकांच्या आरोपांना उत्तर देण्यासाठी कोकाटे यांनी पत्रकार परिषद घेत राजीनामा देणार नसल्याचे स्पष्ट केले. दोषी आढळलो तर नागपूर अधिवेशनात राजीनामा देईल. राजीनामा देण्यासारखं काही घडलेच नाही, असे कोकाटे म्हणाले.

राजीनामा देण्यासारखं काही घडलेच नाही. रमी खेळताना दोषी आढळलो तर हिवाळी अधिवेशनाच्या आधी मी स्वत: राजीनामा देईल. बदनामी केली त्यांना कोर्टात खेचणार. या प्रकरणाची चौकशी करण्यात यावी, त्यासाठी पत्र पाठवणार आहे. मला रमी खेळताच येत नाही. त्यासाठी माझं कोणतेही बँक खाते अथवा मोबाईल क्रमांक जोडलेला नाही, असे माणिकराव कोकाटे यांनी सांगितले.

मुख्यमंत्र्यांच्या नाराजीवर काय म्हणाले कोकाटे ?

मुख्यमंत्र्यांनी व्यक्त केलेल्या नाराजीवर बोलताना कोकाटे म्हणाले की, बातम्या पाहून मुख्यमंत्री बोलले असतील. रमी खेळतानाचा व्हिडिओ खरा असेल तर मी स्वत: राजीनामा देईल. आता राजीनामा देण्याचा विषयच येत नाही, असे कोकाटे म्हणाले. या संपूर्ण प्रकरणाची चौकशी करण्यात येईल, त्याशिवाय ज्यांनी व्हिडिओ व्हायरल केला, त्या सर्वांना कोर्टात खेचणार आहे.