गणेश कवडे, साम टीव्ही

मुंबई : राज्यातील विधानसभा निवडणुकीत महायुतीने जोरदार मुसंडी मारली. महायुतीने २३० जागा पटकावल्या. महायुतीच्या त्सुनामी महाविकास आघाडीला ५०च्या आत गुंडाळलं. महायुतीच्या जोरदार यशामुळे महाविकास आघाडीकडे विरोधी पक्षनेतेपद मिळवण्यासाठी देखील संख्याबळ उरलं नाही. त्यामुळे यंदा विधानभवनात विरोधी पक्षनेतेपद असणार का, याकडे साऱ्यांचे लक्ष लागलं आहे. याचदरम्यान, विरोधी पक्षनेतेपदाबाबत विधानसभा अध्यक्ष राहुल नार्वेकर यांनी मोठं वक्तव्य केलं आहे.

विधानसभा अध्यक्षपदी निवड झाल्यानंतर विधानसभा अध्यक्ष राहुल नार्वेकर यांनी माध्यमांशी संवाद साधला. राहुल नार्वेकर म्हणाले, 'आज माझी बिनविरोध निवड झालेली आहे. राज्यात १३ कोटी जनतेचं नेतृत्व करणाऱ्या लोक प्रतिनिधींना मी बोलण्याची संधी देईल'.

विरोधी पक्षनेतेपदाबाबत राहुल नार्वेकर म्हणाले, 'नियमात जे असेल, त्यानुसार संधी देईन. सभागृहाच्या कामकाजावर बहिष्कार टाकून त्यांनी मतदान केलं. त्यांच्यावर अन्याय करू नका. मी जनतेच्या कोर्टात गेलो. मला ५० हजारांचे लीड मिळाले. जे टीका करतात, त्याकडे मी लक्ष देणार नाही. विरोधकांची संख्या कमी असली तरी त्यांना बोलण्याची संधी देईन'.

'कामकाज सल्लागार समितीत त्यांची संख्या बसत नसताना देखील मी त्यांना समितीत सामावून घेतलं आहे. सर्व बैठका योग्य रित्या होतील. मागील अडीच वर्षाचा तपशील बघितला तर, आम्ही रेकॉर्ड ब्रेक काम केले आहे., असे नार्वेकर म्हणाले.

दरम्यान, सतीश वाघ यांच्या हत्येप्रकरणी राहुल नार्वेकर म्हणाले, 'सतीश वाघ यांचा विषय गंभीर आहे. कायदा सुव्यस्था योग्य असायला हवी. मला खात्री आहे, पोलीस यंत्रणेबाबत सखोल चौकशी करतील'.

अंबादास दानवे मंत्रिमंडळाच्या विस्ताराबाबत काय म्हणाले?

ठाकरे गटाचे आमदार अंबादास दानवे म्हणाले, ' आता बाकीच्या मंत्र्यांचा जाऊद्या. परंतु या तीन जणांनी शपथ घेतलेली आहे. त्यांच्याकडे देखील खाते आले नाहीत. परंतु आता झोपू मुख्यमंत्री आहेत, ते फक्त नामधारी आहेत. त्यांच्याकडे कुठलेही खात्याचं काम नाही. या सरकारला स्वतःचे प्रश्न सोडवणे अवघड जात आहे'.