मागील काही वर्षांपासून स्थानिक स्वराज्य संस्थांच्या निवडणुका झालेल्या नाहीत. गेल्या तीन वर्षांपासून महापालिका आणि जिल्हा परिषदांचा कारभार प्रशासकांच्या हाती आहे. आता लवकरच महापालिकांच्या निवडणुका होतील. याबाबत सर्व पक्षांनी तयारी सुरू केलीय. निवडणुकांबाबत एक मोठी अपडेट समोर आलीय.

चार टप्प्यांमध्ये पार पडणार निवडणुका

राज्यात ऑक्टोंबर महिन्यापासून स्थानिक स्वराज्य संस्थांच्या निवडणुका होणार आहेत. महानगरपालिका आणि जिल्हा परिषदांच्या निवडणुका वेगवेगळ्या होणार आहेत. याबाबत निवडणूक आयोगाकडून लवकरच वेळापत्रक जाहीर केली जाण्याची शक्यता आहे. स्थानिक स्वराज्य संस्थांच्या निवडणुका चार टप्प्यांमध्ये होणार आहेत.

ऑक्टोंबर महिन्याच्या पहिल्या आठवड्यापासूनच मतदानाला सुरुवात होणार असल्याची माहिती समोर आली असून त्यापार्श्वभूमीवर निवडणूक आयोगाकडून त्याबाबत तायरी सुरू करण्यात आलीय.

तयारी होऊनही निवडणुका झाल्या नाहीत

राज्यातील महानगरपालिका, नगरपालिका, जिल्हा परिषदा, पंचायत समिती, आदींच्या निवडणुकांना मुहूर्तच लागत नव्हता. कधी कोरोनाच्या संसर्गाचे कारण, तर कधी ओबीसी आरक्षणाच्या मुद्यामुळे निवडणुका झाल्या नाहीत. कोरोनाचा संसर्ग कमी झाल्यानंतर २०२० पासून राज्यात कुठे एकदा तर कुठे दोनदा, तीनदा स्थानिक स्वराज्य संस्थांच्या निवडणुकांची तयारी करण्यात आली होती. पण या निवडणुका घेण्यात आल्या नाहीत.

जिल्हा परिषद, महानगरपालिकेसारख्या स्थानिक स्वराज्य संस्थांच्या निवडणुकांबाबत सुप्रीम कोर्टाने ६ मे रोजी निर्णय दिला होता. ओबीसींना २०२२ पूर्वी असलेले आरक्षण कायम ठेवत सुप्रीम कोर्टाने राज्य निवडणूक आयोगाला चार महिन्यांच्या आत निवडणुका घेण्याचे निर्देश दिलेत. तसेच चार आठवड्यांच्या आता निवडणुकांसदर्भातील अधिसूचना काढाव्यात असेही निर्देश सर्वोच्च न्यायालयाने दिलेत.

२०२२ मध्ये बांठिया आयोगाचा अहवाल सादर होण्यापूर्वी अस्तित्वात असलेल्या ओबीसी आरक्षणाप्रमाणे स्थानिक स्वराज संस्थेच्या निवडणुका घेण्याचे निर्देश देण्यात आलेत. सुप्रीम कोर्टाने राज्य निवडणूक आयोगाला ४ आठवड्यांच्या आत निवडणुकीची अधिसूचना काढण्याचे निर्देश दिलेत.