संदीप भोसले, साम टीव्ही

रक्षकच भक्षक बनल्याची एक अत्यंत संतापजनक आणि माणुसकीला काळीमा फासणारी घटना लातूर जिल्ह्यातील जळकोट तालुक्यात समोर आली आहे. एका मतीमंद अल्पवयीन मुलीवर वारंवार अत्याचार करणाऱ्या तिच्या सख्ख्या बापाला पोलिसांनी अटक केली आहे. या नराधमाच्या कृत्यामुळे पीडित मुलगी १९ आठवड्यांची गरोदर राहिली असून, या घटनेने संपूर्ण परिसरात तीव्र संतापाची लाट उसळली आहे.

मिळालेल्या माहितीनुसार, पीडित मुलगी जन्मतःच मतीमंद असून तिला स्वतःची व्यथा मांडता येत नव्हती. याच हतबलतेचा फायदा घेत तिचा नराधम बाप डिसेंबर २०२५ पासून तिच्यावर सतत पाशवी अत्याचार करत होता. मुलीच्या शरीरात होणाऱ्या बदलांमुळे ती गरोदर असल्याचे समोर आले. याप्रकरणी पीडितेच्या आईने १७ एप्रिल २०२६ रोजी जळकोट पोलीस ठाण्यात तक्रार दाखल केली होती. सुरुवातीला हा गुन्हा अज्ञात व्यक्तीविरुद्ध दाखल करण्यात आला होता.

मुलगी मतीमंद असल्याने पोलिसांसमोर तपासाचे मोठे आव्हान होते. मात्र, उपविभागीय पोलीस अधिकारी अरविंद रायबोले यांनी या प्रकरणाचे गांभीर्य ओळखून तपासाची चक्रे वेगाने फिरवली. तांत्रिक तपास आणि कौशल्याच्या जोरावर या गुन्ह्यातील खरा नराधम तिचा बापच असल्याचे निष्पन्न झाले. पोलिसांनी ३ मे रोजी त्याला अटक करून बेड्या ठोकल्या आहेत.

या नराधमाविरुद्ध जळकोट पोलीस ठाण्यात भारतीय न्याय संहिता (BNS) आणि पोक्सो (POCSO) कायद्यातील विविध कठोर कलमान्वये गुन्हा दाखल करण्यात आला आहे. सहपोलीस निरीक्षक एस. बी. माचेवाड यांच्या मार्गदर्शनाखाली पोलीस पुढील कायदेशीर कारवाई करत आहेत. पवित्र नात्याला काळिमा फासणाऱ्या या घटनेमुळे आरोपीला कठोर शिक्षा व्हावी, अशी मागणी आता समाजातून होत आहे.