- संदीप भाेसले

लातूर जिल्ह्याला पाणीटंचाईचा प्रश्न भेडसावू लागला आहे. त्यावर मात करण्यासाठी जिल्हाधिकारी वर्षा ठाकूर यांनी बैठकांचा सपाटा लावला आहे. त्यातूनच आता जिल्हाधिकारी ठाकूर यांनी पाणीटंचाईचा प्रश्न तीन दिवसात निकाली काढावा अशी सूचना पाणीटंचाईची बैठकीत अधिकाऱ्यांना दिल्या आहेत. या निर्णयामुळे लातूरकरांना दिलासा मिळण्याची शक्यता आहे.

लातूर जिल्ह्याला पाणीपुरवठा करणाऱ्या 8 मध्यम प्रकल्पांपैकी 5 मध्यम प्रकल्प कोरडे पडले आहेत. दुसरीकडे मांजरा धरणात देखील आता केवळ 0.30 टक्के इतकाच पाणीसाठा राहिला आहे. त्यामुळं दहा ते बारा दिवसाआड लातूर शहराला पाणीपुरवठा करण्याची वेळ लातूर महानगरपालिकेवर आली आहे.

लातूर जिल्ह्यातील पाणीटंचाईचा प्रश्न गांभीर्याने घेत पाणीटंचाई निवारण्यासाठी शहरात व ग्रामीण भागात टँकर आणि खाजगी विहीर- बोर अधिग्रहण करून पाणीटंचाईचा प्रश्न तीन दिवसांत निकाली काढावा अशी सूचना जिल्हाधिकारी वर्षा ठाकूर घुगे यांनी पाणीटंचाईची बैठक घेत अधिकाऱ्यांना दिल्या आहेत.

या निर्णयामुळे लातूर जिल्ह्यातील टंचाईग्रस्त भागातील नागरिकांना आणि लातूरकरांना दिलासा मिळण्याची शक्यता आहे. दरम्यान नाागरिकांनी पाणी जपून वापरावे असे आवाहन महापालिकेने केले आहे.

Edited By : Siddharth Latkar