महाराष्ट्रात २०२४ पासून सरकारकडून लाडकी बहीण योजना सुरु करण्यात आली. गरजू महिलांना मदत मिळावी म्हणून ही योजना सुरु करण्यात आली. या योजनेचा फायदा लाखो महिलांना झाला. मात्र काही नियमांमुळे अनेक महिलांना यातून अपात्र ठरवण्यात आलं. त्यामुळे अनेक महिला नाराज असल्याचं पाहायला मिळत आहे. अहिल्यानगर जिल्ह्यातील महिलांना पात्र असूनही केवायसी (KYC) प्रक्रियेचे कारण देत अपात्र ठरवण्यात आल्यामुळे त्यांचा संताप अनावर झाला आहे. या महिलांनी येत्या २६ ऑक्टोबर रोजी वर्षा बंगल्यावर मोर्चा काढण्याचा इशारा दिला आहे.

राज्य सरकारच्या लाडकी बहीण योजनेच्या माध्यमातून महिलांना आर्थिक मदत दिली जाते. मात्र, योजनेसाठी पात्र असतानाही केवायसीच्या कारणामुळे अनेक महिलांचे अनुदान बंद झाल्याचा आरोप आंदोलक महिलांनी केला. त्यामुळे आर्थिकदृष्ट्या दुर्बल आणि कष्टकरी महिलांसमोर आर्थिक अडचणी निर्माण झाल्या आहेत. घरखर्च, दैनंदिन गरजा आणि कुटुंबाच्या जबाबदाऱ्या सांभाळताना या अनुदानाचा मोठा आधार मिळत होता. मात्र, अचानक अनुदान बंद झाल्याने महिलांमध्ये तीव्र नाराजी पसरली आहे.

जनवादी महिला संघटनेच्या नेतृत्वाखाली काढण्यात आलेल्या या मोर्चाद्वारे महिलांनी सरकारच्या धोरणाविरोधात नाराजी व्यक्त केली. केवळ केवायसीच्या कारणास्तव पात्र महिलांना योजनेच्या लाभापासून वंचित ठेवू नये, अशी मागणी आंदोलकांनी केली. तसेच योजनेतील अटी आणि शर्ती रद्द करून लाभार्थी महिलांचे बंद झालेले अनुदान पुन्हा सुरू करावे, अशी मागणीही करण्यात आली.

लाडकी बहीण योजनेच्या लाभार्थी महिलांचे बंद झालेले अनुदान तातडीने सुरू करावे, अटी रद्द कराव्यात आणि संबंधित महिलांना न्याय द्यावा, अशी मागणी आंदोलनातून करण्यात आली. सरकारने या मागण्यांची दखल घेतली नाही, तर येत्या २६ ऑक्टोबर रोजी मुख्यमंत्री यांच्या वर्षा बंगल्यावर आंदोलन करण्यात येईल, असा इशारा जनवादी महिला संघटनेच्या नेतृत्वाखाली आंदोलक महिलांनी दिला आहे. आता राज्य सरकार या महिलांच्या मागण्यांवर काय भूमिका घेते आणि लाडक्या बहिणींचे बंद झालेले अनुदान पुन्हा सुरू करण्याबाबत काय निर्णय घेते, याकडे सर्वांचे लक्ष लागले आहे.