अहमदनगर : नगरपालिका निवडणुकीच्या पार्श्वभूमीवर भाजपचे माजी आमदार शिवाजी कर्डिले यांचे कट्टर समर्थक नगरसेवक शहाजी जाधव (ठाकूर) यांनी शेकडो कार्यकर्त्यांसह राष्ट्रवादीत प्रवेश केला. त्यापाठोपाठ राहुरी मतदारसंघातील धनगरवाडीचे (ता. नगर) सरपंच किशोर शिकारे यांनी चार ग्रामपंचायत सदस्यांसह भाजपला सोडचिठ्ठी देऊन राष्ट्रवादीत प्रवेश केला.

नगर येथे राष्ट्रवादी काँग्रेसच्या जिल्हा कार्यालयात आज (शनिवारी) नगरविकास राज्यमंत्री प्राजक्त तनपुरे, जिल्हाध्यक्ष राजेंद्र फाळके यांच्या उपस्थितीत हा कार्यक्रम झाला. जिल्हा सरचिटणीस सुनील आडसुरे, राहुरीचे नगराध्यक्ष अनिल कासार, रोहिदास कर्डिले, प्रकाश भुजाडी, बाळासाहेब उंडे, दशरथ पोपळघट, संजय साळवे, राष्ट्रवादी कला, सांस्कृतिक विभागाचे जिल्हाध्यक्ष प्रा. डॉ. श्याम शिंदे उपस्थित होते.

नगरसेवक जाधव (ठाकूर) म्हणाले, की मंत्री तनपुरे नगराध्यक्ष असताना विरोधी नगरसेवक म्हणून प्रभागात विकासकामांमध्ये कधीही दुजाभाव केला नाही. यापुढेही राष्ट्रवादीचे एकनिष्ठ काम करून, पक्षाची व मंत्री तनपुरे यांची ताकद वाढविण्यास मदत करू. जिल्हाध्यक्ष फाळके म्हणाले, की राहुरी पालिकेच्या आगामी निवडणुकीत विरोधकांना शून्यावर बाद करण्याचा मंत्री तनपुरे यांचा प्रयत्न आहे. राष्ट्रवादीकडे तरुण आकर्षित होत आहेत. कार्यकर्त्यांना न्याय देणारा हा पक्ष आहे. जिल्ह्यात राष्ट्रवादीत प्रवेशाचा ट्रेंड सुरू झाला आहे.

मंत्री तनपुरे म्हणाले, की नगरसेवक जाधव (ठाकूर) तळागाळातील जनतेच्या समस्या समजून घेऊन काम करणारे नेतृत्व आहे. त्यांच्या प्रभागात जुन्या-नव्या कार्यकर्त्यांचा मेळ घालून, त्यांना राष्ट्रवादीत योग्य सन्मान मिळेल. नगर तालुक्यात ऊर्जाविषयक समस्या दूर करण्यासाठी नियोजनबद्ध काम चालविले आहे.