अभिजीत देशमुख
कल्याण : कल्याण- डोंबिवली महापालिका क्षेत्रातील २७ गावांमधील सफाई कामगारानी आक्रमक पवित्रा घेतला आहे. केडीएमसीच्या सेवेत समाविष्ट करून घेण्याच्या मागणीसाठी केडीएमसीमधील २७ गावातील सफाई कर्मचाऱ्यांनी महानगर सफाई कर्मचारी संघ , शिवसेना शहरप्रमुख महेश गायकवाड यांच्या नेतृत्वाखाली आज काम बंद धरणे आंदोलन केले. तसेच केडीएमसी मुख्यालयावर मोर्चा काढत मागण्या मान्य न झाल्यास महापालिका अधिकाऱ्यांना घराबाहेर पडू देणार नाही, तसेच महापालिकेच्या कार्यालयांना टाळे ठोकू असा इशारा केडीएमसीला दिला.

महानगर सफाई कर्मचारी संघ, शिवसेना शहर प्रमुख महेश गायकवाड यांच्या नेतृत्वाखाली २७ गावातील शेकडो कामगारांनी आपल्या मागण्यांसाठी केडीएमसी मुख्यालयावर मोर्चा काढला. यावेळी आंदोलनकर्त्या कर्मचाऱ्यांनी महापालिके विरोधात जोरदार घोषणाबाजी केली. कल्याण- डोंबिवली महापालिकेलगतची २७ गावे १ जून २०१५ रोजी महापालिकेत समाविष्ट करण्यात आली. या गावातील ग्रामपंचायतीच्या वास्तू महापालिकेत समाविष्ट करण्यात आल्या. मात्र अद्यापही ग्रामपंचायतमधील कामगारांचा प्रश्न प्रलंबित आहे. २७ गावातील कर्मचाऱ्यांना महापालिकेत समाविष्ट करून घेण्याच्या मागणीसाठी नऊ वर्षापासून पाठपुरावा सुरू आहे. मात्र अद्यापही या कर्मचाऱ्यांना महापालिकेच्या सेवेत समाविष्ट करून घेतले नाही. किमान वेतन दिले जात नाही; असा आरोप कर्मचाऱ्यांनी केला. 

अशा केल्या मागण्या 

शिवसेना शहर प्रमुख महेश गायकवाड यांनी २७ गावातील कामगारांना महापालिकेत कायमस्वरूपी समाविष्ट करा, मृत्यू झालेल्या कामगारांच्या वारसाला महापालिका सेवेत सामावून घ्या, सेवानिवृत्त कामगारांना पेन्शन योजना चालू करा अशा मागण्या केल्या. तसेच मागण्या मान्य न झाल्यास महापालिका अधिकाऱ्यांना घराबाहेर पडून देणार नाही. महापालिकेच्या कार्यालयाला टाळे ठोकू असा इशारा केडीएमसीला दिला.