अभिजित देशमुख 

कल्याण : कल्याणमधील मराठी कुटुंबाला मारहाण केल्याचा प्रकार घडला होता. या प्रकरणी उच्च न्यायालयात याचिका दाखल करण्यात आली असून सुनावणी दरम्यान उच्च न्यायालयाने पोलिसांना घटनेच्या दोन दिवसांचा सीसीटीव्ही जतन करुन ठेवण्याचे आदेश दिले आहेत. तर या प्रकरणात आता २० जानेवारीला पुढील सुनावणी होणार आहे. आत्ता न्यायालया पुढील सुनावणीत काय आदेश देणार याकडे लक्ष लागले आहे.

कल्याण पश्चिमेतील योगीधाम परिसरातील अमजेरा हाईट या उच्चभ्रू सोसायटीत धूप जाळण्याच्या कारणावरुन १८ डिसेंबरच्या रात्री माेठा वाद झाला होता. या वादात मंत्रालयातील अधिकारी अखिलेश शुक्ला यांनी बाहेरुन काही लोकांना बोलावून शेजारी राहणारे अभिजीत देशमुख, धीरज देशमुख यांच्यासह काही जणांना मारहाण केली होती. या मारहाण प्रकरणाचा व्हिडिओ समोर आल्यावर एकच खळबळ उडाली होती. या प्रकरणात खडकपाडा पोलिसांनी गुन्हा दाखल केला होता. 

दरम्यान या प्रकरणात अखिलेश शुक्ला याची पत्नी गीता यांच्यासह अन्य पाच जणांना अटक केली होती. अखिलेश शुक्ला हा मंत्रालयात पर्यटन विभागात कार्यरत असल्याने गाडीवर दिवा लावून फिरत होता, असे आरोप झाले होते. घटनेनंतर अखिलेश शुक्ला याच्या विरोधात निलंबनाची कारवाई करण्यात आली आहे. या प्रकरणात पिडीत कुटुंबियांनी उच्च न्यायालयात धाव घेतली आहे. या प्रकरणी धीरज देशमुख यांनी याचिका दाखल केली आहे. 

दोन दिवसांचे सीसीटीव्ही फुटेज जतन करण्याचे आदेश 

न्यायालयाने याचिकाकर्ता याची बाजू ऐकून घेतले आहे. यात पोलिसांनी गुन्हा दाखल करण्यास विलंब केला. तसेच गुन्ह्यातील मारेकऱ्यांनी पेलिस स्टेशनपर्यंत जखमीचा पाठलाग केला असून या प्रकरणातील सर्व मारकऱ्यांचा सीडीआर तपासण्यात यावा. या प्रकरणातील अन्य आरोपींना पोलिसांनी अटक केलेली नाही. सर्व आरोपीविरोधात मकोका अंतर्गंत कारवाई करण्यात यावी. तर उच्च न्यायालयाने घटनेच्या दिवशी म्हणजे १८ आणि १९ डिसेंबरचा सीसीटीव्ही जतन करुन ठेवावा असे आदेश कल्याण पोलिसांना दिले आहेत; अशी माहिती याचिकर्ता यांनी दिली आहे.