Sand Mafia : अवैध वाळू उपसा; जालन्यात १५ जणांवर गुन्हा दाखल, शंभर ब्रास वाळू जप्त

अक्षय शिंदे 
जालना : अवैध वाळू उपशाचा प्रश्न सध्या गंभीर बनत चालला आहे. या विरोधात महसूल विभागाने देखील कारवाई करण्यास सुरवात केली आहे. त्यानुसार जालन्यात गोंदी येथील गोदावरी नदीपात्रातून वाळूचा उपसा करण्यात येत होता. याठिकाणी महसूल विभागाच्या पथकाने कारवाई करत शंभर ब्रास वाळू जप्त केली आहे. तसेच उपसा करणाऱ्या १५ जणांवर गुन्हा दाखल करण्यात आला आहे. 

मागील काही दिवसांपासून वाळू उपसा करण्याचा मुद्दा चांगलाच ऐरणीवर आला आहे. काही ठिकाणी कारवाईसाठी गेलेल्या पथकावर हल्ला झाल्याच्या घटना देखील घडल्या आहेत. अशातच जालना जिल्ह्यातील गोंदी येथे गोदावरी नदीतून वाळूचा उपसा करण्यात येत असल्याची माहिती महसूल विभागाला मिळाली होती. यावरून पथकाने सदर ठिकाणी धाड कारवाई करत १०० ब्रास वाळू जप्त केली आहे. 

१५ जणांवर गुन्हा दाखल 

गोदावरी नदीतून केनीचा वापर करून अवैध वाळू उपसा करणाऱ्या १५ व्यक्तींविरोधात जालन्यातील गोंदी पोलीस ठाण्यात गुन्हा दाखल करण्यात आला आहे. या कारवाईत जवळपास १०० ब्रास वाळू देखील जप्त करण्यात आली आहे. महसूल पथकाच्या या कारवाईमुळे जिल्ह्यातील वाळू माफियांचे धाबे दणाणले आहे. अंबडचे नायब तहसीलदार विवेक उढान यांच्या फिर्यादीवरून संघटितरित्या वाळू चोरी केल्याप्रकरणी तब्बल १५ वाळूमाफिया विरोधात जालन्यातील गोंदी पोलीस ठाण्यामध्ये गुन्हा दाखल करण्यात आला.

चंद्रभागेत वाळु चोरांचा धुडगूस
पंढरपूर : लाखो भाविकांचे श्रद्धास्थान असलेल्या पंढरपूरच्या चंद्रभागेत वाळू चोरांनी अक्षरशः धूडगूस घातला आहे. चंद्रभागेच्या पात्रातून बेसुमार अवैध‌‌ वाळू उपसा केला‌ जात असल्याने चंद्रभागेचे अस्तित्व धोक्यात आले आहे. चंद्रभागेच्या पात्रातून सध्या गाढवांचा वापर करून अवैध‌ वाळू उपसा व‌ वाहतूक केली जात आहे. दिवसा ढवळ्या चंद्रभागेचे लूट केली जात असताना पोलिस आणि महसूल प्रशासन मात्र गप्प आहे. चंद्रभागेच्या पात्रातून बेकायदेशीरपणे सुरू असलेला‌ वाळू उपसा थांबावा अन्यथा महसूल प्रशासनाच्या विरोधात आंदोलन केले जाईल असा इशारा समाजिक कार्यकर्ते गणेश अंकुशराव यांनी दिला आहे.