अभिजित देशमुख 
कल्याण : कल्याण- डोंबिवली परिसरात डेंगू आणि मलेरियाच्या रुग्णांची वाढती संख्या चिंता वाढवणारी आहे. मेपासून आतापर्यंत डेंगूचे तब्बल ३५ रुग्ण आढळून आले आहेत. तर फक्त जून महिन्यात ४१ आणि जुलैच्या पहिल्या आठवड्यात १८ मलेरियाचे रुग्ण सापडले आहेत. यामुळे केडीएमसीचा आरोग्य विभाग अलर्ट झाला असून ठिकठिकाणी सर्व्हेक्षण सुरु करण्यात आले आहे. 

पावसाळा सुरु झाला कि साथरोगांचा फैलाव होण्यास सुरवात होत असते. प्रामुख्याने डासांची उत्पत्ती झाल्यानंतर डेंगू आणि मलेरिया यासारखे साथरोग पसरत असतात. त्यानुसार मे महिन्यात झालेला अवकाळी पाऊस आणि त्यानंतर मॉन्सूनचा पाऊस यामुळे कल्याण डोंबिवली महानगरपालिका क्षेत्रात साथीच्या आजारांनी पुन्हा डोके वर काढले आहे. त्यानुसार कल्याण- डोंबिवलीत डेंगू आणि मलेरियाचे रुग्ण आढळून आले आहेत.  

संशयित रुग्णांचे सॅम्पल टेस्ट 

केडीएमसीच्या आरोग्य विभागाने दिलेल्या माहितीनुसार मे महिन्यापासून आतापर्यंत डेंगूचे ३५ रुग्ण सापडले आहेत. त्याचबरोबर मलेरियाचे रुग्णही वाढले असून जूनमध्ये ४१ तर जुलै महिन्यात आतापर्यंत १८ रुग्णांची नोंद झाली आहे. तर पालिका वैद्यकीय अधिकाऱ्यांच्या माहितीनुसार प्रत्येक संशयित रुग्णाचा सॅम्पल घेऊन ठाण्यात एलायझा टेस्ट केली जाते. खाजगी हॉस्पिटल्स, लॅब आणि डॉक्टरांकडून दररोजचा डाटा संकलित केला जातो. 

आरोग्य विभागाकडून सर्व्हेक्षण सुरु 

दरम्यान केडीएमसीकडून गृह निर्माण सोसायट्यांच्या अध्यक्षांचा एक विशेष ग्रुप तयार करण्यात आला आहे. नागरी आरोग्य केंद्रातील डॉक्टर या अध्यक्षांच्या सतत संपर्कात राहून संशयित रुग्ण आढळल्यास तात्काळ त्या परिसरात तपासणी, सर्वेक्षण व फवारणी केली जात आहे. तसेच डेंगूच्या अळ्या स्वच्छ पाण्यात वाढत असल्यामुळे एक दिवस ‘कोरडा दिवस’ पाळण्याचे आवाहन देखील आता पालिकेकडून केले जातं आहे.