अक्षय शिंदे 
जालना : जालन्यातील अंबड तालुक्यातील करंजळा येथे एका तरुणाने आत्महत्या केल्याची घटना आज घडली आहे. या घटनेने खळबळ उडाली असून याप्रकरणी मयताच्या नातेवाईकांनी एसबीआय बँकेतील व्यवस्थापकाच्या जाचाला कंटाळून आत्महत्या केल्याचा आरोप केला आहे. 

जालन्याच्या अंबड तालुक्यातील करंजळा या गावात हि घटना घडली आहे. या घटनेत कृष्णा आमटे (वय ३५) असे आत्महत्या करणाऱ्या तरुणाचे नाव आहे. आत्महत्या केल्याचे कळताच नातेवाईकांनी धाव घेत रुग्णालयात दाखल केले. मात्र डॉक्टरांनी त्यास मृत घोषित केले. कृष्णा आमटे याने बँकेकडून कर्ज घेतले होते. या कर्जफेडीसाठी कृष्णा याला बँकेच्या अधिकारी त्रास देत होता. या त्रासाला कंटाळून त्याने आत्महत्या केल्याचा आरोप नातेवाईकांनी केला आहे. 

यानंतर नातेवाईकांनी आक्रमक भूमिका घेत कृष्णाचा मृतदेह पोलीस स्टेशनमध्ये आणला. नातेवाईकांनी गेल्या चार तासापासून गोंदी येथील पोलीस ठाण्यामध्ये मृतदेह ठेवला आहे. यामुळे पोलीस स्थानकात प्रचंड गोंधळ उडाला आहे. बँक व्यवस्थापनावर गुन्हा दाखल करण्याची मागणी केली आहे. नातेवाईकांनी यावेळी बँक व्यवस्थापक विरोधात घोषणाबाजी देखील केली. 

मागील चार तासांपासून नातेवाईकांचे आंदोलन सुरु असून जोपर्यंत शाखा व्यवस्थापकावर गुन्हा दाखल होत नाही; तोपर्यंत मृतदेह ताब्यात घेणार नसल्याचा आक्रमक भूमिका नातेवाईकांसह करंजळा गावकऱ्यांनी घेतली आहे. या सर्व वातावरणामुळे पोलीस स्टेशन परिसरात प्रचंड गोंधळ निर्माण झाला आहे.