अक्षय पाटील, जालना

Jalna Accident 3 Dead News जालना जिल्ह्यातील भोकरदन तालुक्यात सोमवारी रात्री भीषण अपघात घडला आहे. दोन दुचाकींच्या समोरासमोर झालेल्या जोरदार धडकेत तिघांचा जागीच मृत्यू झाला, तर एकजण गंभीर जखमी झाला आहे. जखमी रुग्णावर जवळच्या रुग्णालयात उपचार सुरु आहे. या दुर्घटनेमुळे परिसरात हळहळ व्यक्त केली जात असून मृतांच्या कुटुंबीयांवर दु:खाचा डोंगर कोसळला आहे.

मिळालेल्या माहितीनुसार, ही घटना भोकरदन तालुक्यातील नळणी-राजूर मार्गावर रात्री सुमारे ९ वाजताच्या सुमारास घडली. नळणी येथील सुभाष साठे (वय ४०) आणि विकास साहेबराव साठे (वय ३८) हे दोघे चुलत भाऊ आपल्या दुचाकीने राजूरहून नळणीकडे परत येत होते. दरम्यान, त्यांच्या गावापासून अवघ्या एक किलोमीटर अंतरावर असताना समोरून येणाऱ्या दुसऱ्या दुचाकीशी त्यांची जोरदार धडक झाली.

समोरच्या दुचाकीवर बरंजळा साबळे येथील अनिल संतोष बोराडे (वय २०) आणि समाधान सर्जेराव कोरके (वय २२) हे दोघे नळणीमार्गे राजूरकडे जात होते. दोन्ही दुचाकींची समोरासमोर जोरदार टक्कर झाल्याने अत्यंत भीषण अपघात झाला. या अपघातात सुभाष साठे, विकास साठे आणि अनिल बोराडे यांचा घटनास्थळीच मृत्यू झाला.

समाधान कोरके हा तरुण गंभीर जखमी झाला असून त्याच्यावर तातडीने उपचार सुरू करण्यात आले आहेत. अपघाताची माहिती मिळताच स्थानिक नागरिक आणि पोलिसांनी घटनास्थळी धाव घेतली. जखमीला तातडीने रुग्णालयात दाखल करण्यात आले, तर मृतदेह शवविच्छेदनासाठी पाठवण्यात आले.

या अपघातामुळे नळणी आणि परिसरात शोककळा पसरली असून विशेषतः एकाच कुटुंबातील दोन चुलत भावांचा मृत्यू झाल्याने गावात हळहळ व्यक्त होत आहे. पोलिसांनी या प्रकरणी अपघाताची नोंद करून पुढील तपास सुरू केला आहे. नागरिकांनी रात्रीच्या वेळी वाहन चालवताना विशेष काळजी घ्यावी, असे आवाहनही प्रशासनाकडून करण्यात आले आहे.