जळगाव : पोलिसांनी जप्त केले वाहन सोडण्यासंदर्भात कोर्टाने आदेश दिले होते. मात्र तक्रादाराचे वाहन सोडण्यासाठी १५ हजार रुपयांची मागणी केली. तडजोडीअंती ठरलेली १० हजाराची रक्कम स्वीकारताना रावेरच्या निंभोरा पोलीस स्टेशनचे पोलीस उपनिरीक्षकास लाचलुचपत प्रतिबंधक विभागाने ताब्यात घेतले आहे. 

रावेर (Raver) तालुक्यातील निंभोरा पोलीस स्टेशनमध्ये कार्यरत कैलास ठाकूर (वय ४०) असे अटक केलेल्या पोलीस उपनिरीक्षकाचे नाव आहे. निंभोरा पोलीस स्टेशन अंतर्गत चार महिन्यांपूर्वी एका वाहनावर गुटख्याची कारवाई करण्यात आली होती. या कारवाईत पोलिसांनी वाहन जप्त केले होते. हे वाहन सोडविण्यासाठी तक्रारदाराने न्यायालयात धाव घेतली होती. न्यायालयाने तक्रारदाराला वाहन देण्याबाबत आदेशित केले. मात्र निंभोरा पोलीस स्टेशनचे पीएसआय कैलास ठाकूर यांनी हे वाहन सोडविण्यासाठी १५ हजारांची लाच (Bribe) मागितली. 

तक्रारदाराने याबाबत जळगाव लाचलुचपत प्रतिबंधक विभागाला (Jalgaon ACB) तक्रार दिली. याची खातरजमा करत सापळा रचण्यात आला. निंभोरा गावात मरीमाता मंदिराजवळ पीएसआय ठाकूर यांना तक्रारदार यांच्याकडून १० हजारांची लाच स्वीकारताना लाचलुचपत प्रतिबंधक विभागाकडून अटक करण्यात आली.