Chhatrapati Sambhajinagar Corporation: धोकादायक होर्डिंगला क्लीन चीट देण्याचा डाव?; मुदत संपल्यानंतर संभाजीनगर मनपाकडून कारवाई नाहीच

रामू ढाकणे 

छत्रपती संभाजीनगर : मुंबईच्या घाटकोपरमध्ये झालेल्या घटनेनंतर राज्यभरात होर्डिग्जचा प्रश्न ऐरणीवर आला होता. त्यानुसार संभाजीनगर शहरात लावण्यात आलेल्या स्ट्रक्चरल ऑडिटचे आदेश दिले होते. मात्र कोणीही याचे गांभीर्य न घेता अहवाल सादर केला नाही. यानंतर मनपाने कोणत्याही प्रकारची कारवाई एजन्सीवर केली नसल्याने त्यांना क्लीन चिट देण्याचा प्रयत्न सुरु असल्याचे बोलले जात आहे. 

मुंबईत घाटकोपरमध्ये (Ghatkopar) महाकाय होर्डिंग कोसळून १६ जणांना आपला जीव गमवावा लागला होता. त्यानंतर राज्यभर होर्डिंगचा मुद्दा ऐरणीवर आला असून छत्रपती संभाजीनगर महापालिकेने शहरातील होर्डिंग वाल्यांना नोटीस बजावून ४ जूनपर्यंत सर्व होर्डिंगचे स्ट्रक्चरल ऑडिट अहवाल सादर करा असे आदेश दिले होते. मात्र ही मुदत उलटून अनेक दिवस झाल्याने महापालिकेकडून अद्याप कोणतीही ठोस कारवाई करण्यात आली नाही. त्यामुळे पालिका (Sambhajinagar) प्रशासनाने सर्व होर्डिंगला क्लीनचीट दिली की काय? अशी शंका शहरवासीयांकडून उपस्थित केली जात आहे. 

शहरात अनेक जीर्ण इमारतीवर धोकादायक होर्डिंग अजूनही उभेच आहे. दरम्यान शहरातील १४ एजन्सींना नोटीसा पाठवून पालिकेने ४१० होर्डिंग संबंधित इमारतीच्या स्ट्रक्चरल ऑडिट अहवाल आठ दिवसात सादर करावा; अन्यथा होर्डिंग बेकायदा ठरवून ते पाळण्यात येईल आणि संबंधित इमारतीला देखील सील लावण्यात येईल असा कडक इशारा देखील दिला होता.