जळगाव :राजकारणात सक्रिय असलेले वडील प्रचारासाठी जाणार होते. यामुळे गतिमंद असलेल्या मुलीला घरात राहू देत दाराला कडी लावून मार्गस्थ झाले. मात्र काही वेळाने मुलीने गॅलरीतून खाली उतरण्याचा प्रयत्न केला असता तिसऱ्या मजल्यावरून खाली पडली. यात तिचा जागीच मृत्यू झाल्याची घटना जळगाव शहरातील मुंदडा नगरात घडली. 

प्रेरणा रमेश गजरे (वय १९) असे मृत झालेल्या मुलीचे नाव आहे. (Jalgaon News) दरम्यान प्रेरणा हि गतिमंद असल्याने वडील रमेश गजरे तिची काळजी घेत होते. तिला कधीच एकटी सोडत नसत. मात्र विधानसभा निवडणुकीच्या रणधुमाळीत त्यांना अमळनेर (Amalner) येथे प्रचारला जायचे असल्याने आपण लगेच परत येऊ म्हणून जेवणानंतर प्रेरणाला घरातच राहण्याचे सांगत त्यांनी फ्लॅटच्या मुख्य दाराला कडी लावून निघून गेले. 

साडी बांधून उतरण्याचा प्रयत्न 
वडिलांनी दार बाहेरुन बंद केल्याने घरात एकटी असल्याने प्रेरणा हिला कंटाळा आला. यामुळे बाहेर जाऊ या उद्देशाने तिने कपाटातून काही साड्या काढल्या. गॅलरीला बांधून खाली खेळायला जाण्याच्या इराद्याने तिने उतरण्याचा प्रयत्न केला. तसे करताना तिच्या हातातून साडी सुटली आणि ती थेट तिसऱ्या मजल्यावरून खाली कोसळली. यात तिचा मृत्यू झाला. जोरात आवाज झाल्याने शेजाऱ्यांनी धाव घेतली तर रक्ताच्या थारोळ्यात प्रेरणा पडलेली दिसली. याबाबत तिच्या वडिलांना माहिती देण्यात आल्यानंतर ते लागलीच आले. मुलीचा मृतदेह पाहून त्यांनी आक्रोश केला.