पाळधी (जळगाव) : गेल्‍या काही दिवसांपासून सुर्य आग ओकत आहे. यामुळे (Temperature) तापमान ४२ अंशाच्‍यावर पोहचले आहे. याचा अनेकांना त्रास होत आहे. यात पाळधी येथील (Farmer) शेतकऱ्याचा उष्माघाताने मृत्यू झाल्याची घटना मंगळवारी (ता. १८) दुपारी घडली. (Latest Marathi News)

राज्‍यात उष्‍णतेची लाट पसरली आहे. राज्‍यातील अनेक शहरांमधील तापमान हे ४२ अंशाच्‍यावर पोहचले आहे. तापमान वाढीमुळे सकाळी दहा वाजेपासूनच उष्‍णतेच्‍या झळा जाणवत आहेत. दरम्‍यान मंगळवारी जळगाव जिल्‍ह्यातील तापमानाचा पारा हा ४५ अंशावर पोहचला होता. यामुळे तिव्र उन्‍हाच्‍या झळा असह्य झाल्‍या. उष्‍णतेचा त्रास होवून शेतकऱ्याचा उष्माघाताने मृत्‍यू झाला. जिल्‍ह्यात यंदा उष्माघाताचा दुसरा बळी आहे.

शेतातून आले अन्‌

पाळधी (ता. धरणगाव) येथील शेतकरी शांताराम बुधा भराडी (वय ४०) यांची दोन बिघे शेती आहे. ते मंगळवारी सकाळी शेतात काम करण्यासाठी गेले होते. दुपारी घरी आल्यानंतर त्यांची तब्येत अचानक खराब झाली. उपचारासाठी रुग्णालयात घेऊन गेल्यानंतर त्यांची तब्येत आणखी बिघडली. डॉक्टरांनी तपासणी केल्यावर त्यांना मृत घोषित केले. त्यांचा मृत्यू उष्माघाताने झाला. त्यांच्या पश्‍चात पत्नी, तीन मुले, दोन भाऊ असा परिवार आहे.