जळगाव : शेती करून हार्डवेअरचे दुकान सांभाळणाऱ्या वडिलांनी आपल्या मुलाला दुकानावर बसण्यास सांगून जळगावी काममिनित्ताने निघून गेले. मुलाने दुकान देखील सांभाळले. मात्र रात्री घरी न परतल्याने कुटुंबीय चिंतेत सापडले होते. दरम्यान दुसऱ्या दिवशी एरंडोल तालुक्यातील खर्ची गावाजवळ मुलाचा मृतदेह आढळून आला. या घटनेने कुटुंब हादरले असून परिसरात देखील खळबळ उडाली आहे. 

जळगावच्या एरंडोल तालुक्यातील रिंगणगाव येथील तेजस गजानन महाजन (वय १३) असे मृत मुलाचे नाव आहे. दरम्यान तेजस हा रिंगणगाव येथे आई, वडील, मोठी बहीण यांच्यासह राहत होता. तर त्याचे वडील गजानन हे शेती काम करून हार्डवेअरचे दुकान चालवतात. दरम्यान १६ जूनला गजानन महाजन यांनी तेजस यास दुकानावर बसवून जळगावला कामानिमित्त निघून गेले होते. रात्री ते घरी परतले. मात्र तेजस आला नसल्याचे त्यांना दिसून आले. 

रात्रभर शोधाशोध 

त्यांनी घरात विचारणा केली असता तो अद्याप आला नसल्याचे घरच्यांनी सांगितले. यामुळे दुकानावर गेले असता तेथे देखील तो नव्हता. यामुळे शोधाशोध सुरू झाली. तसेच एरंडोल पोलीस स्टेशनला कुटुंबीयांनी तक्रार दाखल केली. पोलिसांनी तपासचक्र फिरवीत तेजसचा शोध रात्रभर सुरू ठेवला होता. मात्र सापडून आला नव्हता.

दरम्यान दुसऱ्या दिवशी सकाळी ८ वाजेच्या सुमारास एरंडोल तालुक्यातील खर्ची गावाजवळ निंबाळकर यांच्या शेतामध्ये १३ वर्षीय मुलाचा मृतदेह गळा चिरलेल्या अवस्थेत आढळून आला. याची माहिती पोलिसांना दिली. यानंतर पोलिसांनी घटनास्थळी जात तपास केला असता मृतदेह तेजसचाच असल्याचे स्पष्ट झाले. कुटुंबियांना याची माहिती मिळताच जबर धक्का बसला. दरम्यान तेजसची हत्या कोणत्या कारणामुळे आणि कोणी केली? याचा तपास पोलीस करत आहे.