जळगाव : सायबर गुन्हेगार ऑनलाईन फसवणूक करण्याचे वेगवेगळे प्रकार अमलात आणत आहेत. यात भारतीय सैन्य दलातील जवानांची वैद्यकीय तपासणी करायचे सांगून जळगावातील महिला डॉक्टराची फसवणूक झाली आहे. या प्रकरणी फसवणुकीचा गुन्हा दाखल करण्यात आला आहे. 

जळगावातील (Jalgaon) डॉ. सुजाता प्रमोद महाजन यांची एक लाख २४ हजार ९९२ रुपयांमध्ये फसवणूक करण्यात आली आहे. गांधीनगरात डॉ. सुजाता महाजन यांचे हॉस्पिटल असून त्यांना २० मेस अनोळखी क्रमांकावरून फोन आला. यावेळी समोरच्याने सैन्य दलातील अधिकारी बोलत असल्याचे सांगत तुमच्याकडे जवानांची वैद्यकीय तपासणी करायचे असल्याचे सांगितले. त्यासाठी त्याने व्हिजिटिंग कार्ड (Cyber Crime) मागविले. दुसऱ्या दिवशी डॉ. प्रमोद महाजन यांना ४० ते ५० जवानांची तपासणी करायचे त्याने असल्याचे सांगितले. 

यासाठी पैसे ट्रान्सफर करण्यासाठी फोन पे क्रमांक मागितला. त्यानुसार डॉ. प्रमोद महाजन यांनी पत्नी डॉ. सुजाता महाजन यांचा फोन-पे क्रमांक दिला. बोलणे सुरू असताना, फोन-पेवर डॉ. सुजाता महाजन यांच्या बँक खात्यातून पैसे ट्रान्सफर होऊ लागले. मात्र काही वेळातच त्यांच्या खात्यातून एक लाख २४ हजार ९९२ रुपये विड्रॉल करण्यात आले. याबाबत डॉ. सुजाता महाजन यांनी १० जूनला दिलेल्या फिर्यादीवरून जिल्हापेठ (Police) पोलिस ठाण्यात गुन्हा दाखल झाला आहे.