जळगाव : मंदिर देखील आता सुरक्षित राहिले नसल्याचा अनुभव पुन्हा एकदा आला आहे. दोन दिवसांवर महाशिवरात्री आली असताना पुरातन महादेव मंदिरात चोरी झाल्याच्या घटनेने खळबळ उडाली आहे. भडगाव तालुक्यातील कजगाव येथे महादेव मंदिरातील पिंडीवरील सोन्याचा पत्रा यासह त्रिशूल व पितळी नाग घेऊन चोरटा फरार झाला आहे. या घटनेमुळे परिसरात खळबळ उडाली आहे. 

जळगाव जिल्ह्यातील भडगावच्या कजगाव येथील वाडे रस्त्यावरील मनमाड कंपनी भागात पुरातन मनकामेश्र्वर महादेव मंदिर आहे. या मंदिरात २२ फेब्रुवारीच्या मध्यरात्री अज्ञात चोरट्यांनी चोरी करुन मंदिरातील तांबे पितळाच्या सुमारे ८० हजारांच्या वस्तू चोरुन नेल्या. चोरटे गावांमध्ये फिरत टेहळणी करत असतात. बंद घरांमध्ये चोरी करण्यासोबतच गावातील मंदिरांमध्ये देखील चोरी करत आहेत. यामुळे मंदिरातील देव देखील सुरक्षित नसल्याची चर्चा आता होऊ लागली आहे. 

महाशिवरात्रीची तयारी 

येत्या २६ फेब्रुवारीला महाशिवरात्री आहे. यामुळे शिव मंदिरात याची जोरदार तयारी सुरु आहे. त्यानुसार कजगाव येथील पुरातन मंदिरात देखील महाशिवरात्रीचे नियोजन करण्यात आले होते. यापूर्वीच या पुरातन महादेव मंदिरात चोरी झाल्याने खळबळ उडाली आहे. सकाळी भाविक दर्शन घेण्यासाठी आले असता हा प्रकार उघडकीस आला. यानंतर संपूर्ण गावात चोरी झाल्याची बातमी पसरली. 

पिंडीवरील पत्रा, नाग, त्रिशूल नेला चोरून  

भल्या पहाटे देवळात चोरट्याने प्रवेश करत महादेवाच्या पिंडीवरील वस्तू चोरून नेल्या आहेत. महाशिवरात्री पूर्वीच या महादेवाच्या पिंडीवरील साज पितळी नाग, पिंडीवरील सोन्याचे कवच आणि त्रिशूल असा ७० ते ८० हजारांच्या विविध वस्तू चोरुन नेल्याची घटना पहाटे ४ वाजेच्या सुमारास घडली असून चोरटा सीसीटीव्ही कॅमेऱ्यात कैद झाला आहे. या संपूर्ण प्रकाराची चौकशी भडगाव पोलीस करत आहेत.