अमळनेर (जळगाव) : पावसाने उघडीप दिल्याने आता शेती कामाला वेग आला आहे. यात शेतात फवारणी करत असताना विहिरीत टाकलेल्या मोटारीच्या वायरला स्पर्श झाल्याने तरुणाचा मृत्यू झाला. सदरची घटना अमळनेर तालुक्यातील वावडे या गावशिवारात ३१ जुलैला दुपारच्या सुमारास घडली.

अमळनेर (Amalner) तालुक्यातील वावडे गावातील गौरव दीपक माळी (वय २०) असे घटनेतील मृत तरुणाचे नाव आहे. गौरव हा धुळे येथे ‘बीसीए’चे शिक्षण घेत होता व सुट्टीवर घरी आलेला असता ही दुर्दैवी घटना घडली. शेतात वडिलांना मदत म्हणून गौरव हा फवारणीच्या कामासाठी गेला होता. फवारणी करताना विहिरीवर लावलेल्या मोटारच्या वायरचा स्पर्श त्याच्या मानेला झाल्याने त्याला विजेचा जोरदार धक्का (Electric Shock) बसला. पावसामुळे जमीन देखील ओली असल्याने विद्युत प्रवाह संपूर्ण शरीरात गेला. 

घटना घडली यावेळी त्याचे वडील देखील शेतातच होते. घटनेनंतर त्याचे वडील व गावातील लोकांनी त्याला उपचारासाठी अमळनेर ग्रामीण रुग्णालयात नेले असता डॉक्टरांनी तपासून त्यास मृत घोषित केले. या प्रकरणी मारवड पोलिसात अकस्मात मृत्यूची नोंद करण्यात आली आहे. मुलाच्या मृत्यूमुळे कुटुंबावर दुःखाचा डोंगर कोसळला आहे.