अमर घटारे, साम टीव्ही

Mla Ravi Rana Death Threat News: अमरावतीचे अपक्ष आमदार रवी राणा यांना फोनवरून जीवे मारण्याची धमकी मिळाल्याची माहिती आहे. तू महाराष्ट्रभर फिरणे बंद कर, नाहीतर तुझ्या जीवाचे काहीतरी करून टाकू... असा धमकीचा फोन रवी राणा (Mla Ravi Rana) यांना आला आहे. याबाबत रवी राणा यांच्या स्वीय सहाय्यकाकडून अमरावतीच्या राजपेठ पोलीस स्टेशनमध्ये तक्रार दाखल करण्यात आली आहे.

औरंगाबाद येथील अर्जुन लोखंडे नावाच्या व्यक्तिकडून रवी राणा यांना जीवे मारण्याची (Death Threat) धमकी आल्याचा आरोप केला जात आहे. तू आमच्या विरोधात कसा काय बोलतो, एवढ्या वेळेस थांब नाहीतर तुला संपवून टाकतो, अशी धमकी दिल्याचा तक्रारीत उल्लेख करण्यात आला आहे.

इतकंच नाही, तर तू महाराष्ट्रभर फिरणे बंद कर... नाहीतर तुझ्या जीवाचे काही तरी करून टाकू... अचानक काही घडलं किंवा अपघात झाला तर मग म्हणू नको... असं सुद्धा धमकी देणाऱ्या व्यक्तीने म्हटलं असल्याची पोलिस तक्रारीत नमूद करण्यात आलं आहे.

गेल्या काही दिवसांपासून राज्यातील राजकीय नेते तसेच आमदारांना सातत्याने जीवे मारण्याच्या धमक्या दिल्या जात आहे. मंगळवारी राष्ट्रवादीचे मंत्री छगन भुजबळ यांना एका व्यक्तीने फोनवरून धमकी दिली होती. त्यानंतर मंत्री धनंजय मुंडे यांना सुद्धा धमकीचा फोन आला होता.

सरकारमधील दोन्ही मंत्र्यांना एकाच दिवशी फोनवरून जीवे मारण्याची धमकी मिळाल्याने राजकीय वर्तुळात मोठी खळबळ उडाली होती. दरम्यान, पुणे पोलिसांनी छगन भुजबळ यांना धमकी देणाऱ्या व्यक्तीला रायगड येथून अटक केली. दारूच्या नशेत आपण धमकी दिल्याचं या व्यक्तीने सांगितलं. आता रवी राणा यांना जीवे मारण्याची धमकी आल्याने राज्यात पुन्हा कायदा सुव्यवस्थेचा प्रश्न ऐरणीवर आला आहे.

Edited by - Satish Daud