राज्यात पुन्हा उत्तरेकडील थंड वाऱ्यांचे प्रवाह येत असल्याने वातावरणात गारवा पसरत आहे. आज महाराष्ट्रात अंशतः ढगाळ हवामानासह हुडहुडी कायम राहण्याचा अंदाज आहे. तर मध्य महाराष्ट्रात थंडीच्या लाटेच्या शक्यतेमुळे येलो अलर्ट कायम असल्याचे हवामान विभागाने म्हटले आहे. दरम्यान वर्षाच्या शेवटच्या महिन्याच्या सुरुवातीला राज्यात वातावरण थंडगार झालं आहे.

मध्य महाराष्ट्र, मराठवाडा, विदर्भात गारठा कायम असून, काही ठिकाणी पहाटे धुकं पाहायला मिळत आहे. काल धुळे येथे नीचांकी ७ अंश तापमानाची नोंद झाली. तसेच निफाड येथे ८.९ अंश सेल्सिअस, तर परभणी येथे ९.८ अंश, जेऊर, अहिल्यानगर आणि भंडारा येथे पारा १० अंश व त्यापेक्षा खाली आल्याने गारठा कायम आहे.

दरम्यान, काल सकाळपर्यंत २४ तासांमध्ये कोकणातील रत्नागिरी येथे ३३ अंश सेल्सिअस कमाल तापमानाची नोंद झाली. आज मध्य महाराष्ट्रातील नंदूरबार, धुळे, जळगाव, नाशिक, अहिल्यानगर, पुणे जिल्ह्यांत थंडीची लाट येण्याची शक्यता असल्याने हवामान विभागाने येलो अलर्ट दिला आहे. उर्वरित राज्यात गारठा कायम राहणार आहे.

बंगालच्या उपसागरातील ‘डिटवाह’ चक्रीवादळच संकट निघून गेल्यानंतर त्याचे अवशेष असलेले तीव्र कमी दाब क्षेत्र (डिप्रेशन) उत्तर तमिळनाडू, दक्षिण आंध्र प्रदेशच्या किनाऱ्याजवळ सक्रिय आहे. मात्र याचा फटका महाराष्ट्राला बसणार नसून राज्यात थंडीची लाट कायम राहणार आहे.