पिंपरी चिंचवड : नदी सुधार प्रकल्पाच्या नावाखाली पिंपरी चिंचवड महापालिकेने मुळा नदीपात्रात भराव टाकला आहे. याबाबत जलसंपदा विभागाकडून महापालिकेला नोटीस बजावण्यात आली आहे. यानुसार नदीत टाकण्यात आलेल्या राडारोडा महापालिकेने तातडीने स्वखर्चाने काढून घ्यावा. अन्यथा योग्य कायदेशीर कारवाई करू; अशी नोटीस देऊन पिंपरी चिंचवड महापालिकेला चांगलंच फटकार आहे.

नदी सुधार प्रकल्पाच्या नावाखाली कोट्यावधी रुपये खर्च करून पिंपळे निलख येथून वाहणाऱ्या मुळा नदीपात्रात पिंपरी चिंचवड महापालिकेने मोठ्या प्रमाणात भराव टाकण्याचे काम केले आहे. अर्थात या भरावामुळे नदीच्या नैसर्गिक प्रवाहात अडथळा निर्माण करण्यात आला आहे. तसेच हा भराव टाकल्यामुळे नदीच्या वहन क्षमतेत अतिक्रमण करण्यात आले आहे. यामुळे भविष्यात पूर परिस्थिती निर्माण होऊन लोकांच्या जीवितास धोका उद्भवू शकतो. याबाबत सामाजिक कार्यकर्ते रविराज काळे यांनी तक्रार केली होती.

राडारोडा काढण्याच्या सूचना 

हि सर्व परिस्थिती लक्षात घेता जलसंपदा विभागाकडून पिंपरी चिंचवड महापालिकेला नोटीस बजावण्यात आली आहे. त्यामुळे पिंपरी चिंचवड महापालिकेने पावसाळ्यापूर्वी स्वखर्चाने नदी पात्रात टाकण्यात आलेला नदी सुधार योजनेचा राडारोडा काढून घ्यावा; अशा सूचना जलसंपदा विभागाने दिल्या आहेत. मुळा नदीपात्रात टाकण्यात आलेल्या भराव व राडारोड्यामुळे भविष्यात नागरिकांच्या जीवास धोका उद्भवल्यास त्याची सर्वस्व जबाबदारी ही पिंपरी चिंचवड महापालिकेची असेल असे या नोटीसमध्ये उल्लेख करण्यात आला आहे. 

मात्र महापालिकेला प्राप्त झालेली नोटीस ही नदीपत्रात उभारण्यात आलेल्या कॉपर बँक साठीच आहे. त्याचा पूर्ण नदीपात्राशी संबंध नाही; अशी माहिती पिंपरी चिंचवड महापालिकेचे आयुक्त तसेच प्रशासक शेखर सिंह यांनी माध्यमांशी बोलताना दिली आहे. यामुळे आता जलसंपदा विभाग काय भूमिका घेणार हे पाहणे महत्वाचे ठरणार आहे.