शुभम देशमुख 

Pindkepar News

गोंदियाच्या गोरेगाव तालुक्यातील पिंडकेपार येथे विद्युत शॉर्ट सर्किटमुळे सकाळी घराला अचानक आग (Gondia) लागल्याची घटना घडली. या घटनेत घरातील सर्व साहित्य व विद्युत उपकरणे जळून खाक झाले आहे. यामध्ये लाखोंचे नुकसान झाले आहे.

उन्हाळ्यात प्रामुख्याने आग लागल्याच्या घटना अधिक घडत असतात. पिंडकेपार येथील रमेश पटले यांचे मालकीचे मातीचे घर असून अचानक घराला विद्युत शॉर्टसर्किटमुळे आग लागली. दरम्यान, शेजाऱ्यांनी आगीवर (Fire) नियंत्रण मिळविण्याचा प्रयत्न केला. मात्र, लाकडी घर असल्याने आग आटोक्यात आली नाही. अथक प्रयत्नानंतर आगीवर नियंत्रण मिळविता आले. 

('साम टीव्ही'चं व्हॉट्सअँप चॅनल जॉईन करण्यासाठी येथे क्लिक करा)

आगीत लाखोंचे नुकसान 

लाकडी घराला लागलेल्या आगीत यात लाखो रुपयांचे नुकसान झाल्याचे सांगण्यात येत आहे. आगीने रौद्ररुप घेत घरातील साहित्यांसह जनावरांचा चारा, लाकडी चिरान व इतर साहित्य जळून खाक झाले. यामुळे रमेश पटले यांचा संसार उघड्यावर पडला आहे. याचा पंचनामा करून मदत मिळावी अशी मागणी केली जात आहे.