• जळगावच्या सराफा बाजारात सोनं-चांदीच्या दरात मोठा बदल

• आज सोन्याच्या दरात २,००० रुपयांची घसरण झाली

• १ किलो चांदी ४,००० रुपयांनी स्वस्त झाली

• जीएसटीसह २४ कॅरेट सोन्याचा दर १,४७,२९० रुपये

संजय महाजन, जळगाव

सोनं-चांदी खरेदी करणाऱ्यांसाठी आनंदाची बातमी आहे. जळगावच्या सराफा मार्केटमध्ये सोनं-चांदीच्या दरात आज मोठा बदल झाला. गेल्या काही दिवसांपासून सोनं-चांदीच्या दरात वाढ होत होती. आज सोनं-चांदीच्या दरात मोठी घसरण झाली. त्यामुळे ग्राहकांना मोठा दिलासा मिळाला. आज सोनं आणि चांदी खरेदी करण्याची चांगली संधी आहे. १ तोळा सोन्याच्या दरामध्ये २००० रुपयांची घसरण झाली तर चांदीच्या दरात ४००० रुपयांची घसरण झाली.

जळगावच्या सुवर्णनगरीत सोनं- चांदीच्या दरात गेल्या काही दिवसांपासून सातत्याने चढ-उतार होत असतानाचे चित्र अद्यापही कायम आहे. गेल्या ८ दिवसांचा जर विचार केला तर सोनं आणि चांदीच्या दरात वाढ होताना आपण पाहिला आहे. पण आज ८ दिवसांनंतर सोनं-चांदीच्या दरात मोठी घसरण झाल्याचे पाहायला मिळत आहे.

आज पुन्हा २४ कॅरेटच्या १ तोळा सोन्याच्या दरात २००० रुपयांची तर १ किलो चांदीच्या दरात ४००० रुपयांची घसरण झाली असून सर्वसामान्य ग्राहकांना दिलासा मिळाला आहे. आज सोन्याचा दर जीएसटीसह १ लाख ४७ हजार २९० रुपये इतका झाला आहे. तर चांदीचा दर जीएसटीसह २ लाख २९ हजार ६९० रुपये इतका झाला आहे. आखाती देशात सुरू असलेल्या युद्धजन्य परिस्थितीचा थेट परिणाम हा सोनं आणि चांदीच्या दरावर होत असल्याचे मत तज्ज्ञांनी व्यक्त केले आहे.