राज्यात मारहाण प्रकरणांमध्ये वाढ झाली आहे. लातूरमध्ये मित्रांच्या दोन टोळीमध्ये तुफान राडा झाला आहे. हा राडा आधी हॉटेलमध्ये झाला नंतर हॉटेलमधून बाहेर येत हा राडा भररस्त्यात सुरू झाला. या राड्यात एका तरूणाला लोखंडी रॉडने वार केले आहे आणि त्याला दगडाने ठेचलं आहे. या प्रकरणी पोलिसांनी ७ जणांवर कारवाई करत ४ जणांना ताब्यात घेत त्यांची धिंड काढली आहे.

लातूरच्या अंबाजोगाई रोड परिसरात एका हॉटेलमध्ये दोन मित्रांच्या टोळीमध्ये तुफान राडा झाला. हॉटेलमध्ये राडा झाल्यानंतर ही टोळी बाहेर रस्त्यावर गेली. भररस्त्यावर तुफान राडा झाला. एका तरूणाला लोखंडी रॉडनं आणि दगडानं मारहाण करण्यात आल्याचा धक्कादायक प्रकार घडला. मारहाणीचा व्हिडिओ देखील सोशल मीडियात व्हायरल झाला.

या प्रकरणाची माहिती मिळाल्यानंतर पोलिसांनी घटनास्थळी धाव घेत तपास केला. तसेच ७ जणांवर गुन्हा दाखल केला आणि चार जणांना ताब्यात घेतलं आहे. तसेच यातील चार आरोपींची पोलिसांनी धिंड काढली आहे. ताब्यात घेतल्यानंतर आरोपींनी न्यायालयात नेण्यात आलं. ३ आरोपींना न्यायालयाने पाच दिवसांची पोलीस कोठडी सुनावली आहे. तर एकाची बाल सुधारगृहात रवानगी केली आहे.

आरोपींची पार्श्वभूमी ही गुन्हेगारी स्वरूपाची आहे. यातील ६ आरोपींवर या आधी देखील गंभीर गुन्हे दाखल करण्यात आले आहे. या प्रकरणी ४ जणांना शिक्षा सुनावण्यात आली आहे. मात्र, ३ जण अद्याप फरार आहे. फरार आरोपींचा शोध पोलीस घेत आहेत.