गणेश शिंगाडे, साम टीव्ही

राज्यात एकीकडे धुमधडाक्यात गणेशोत्सव साजरा होत आहे. तर दुसरीकडे गडचिरोलीत पोलीस आणि नक्षलवाद्यांमध्ये चकमक सुरु आहे. या चकमकीत पोलिसांनी चार नक्षलवाद्यांचा खात्मा केला. गडचिरोलीच्या भामरागड तालुक्यातील कोपर्शीच्या जंगलात ही चकमक झाली. चकमकीच्या घटनेने परिसरात खळबळ उडाली.

मिळालेल्या माहितीनुसार, गडचिरोली जिल्ह्यात चार नक्षलवाद्यांना ठार मारण्यात पोलिसांना यश आलं. गडचिरोलीच्या भामरागड तालुक्यात कोपर्शीच्या जंगलात सुरू असलेल्या चकमकीत चार नक्षलवादी ठार झाले. त्यात एक पुरुष आणि तीन महिलांचा समावेश आहे. जंगलात शस्त्रसाठा ही सापडला असून अजूनही चकमक सुरू आहे.

पोलिसांनी दिलेल्या माहितीनुसार, गडचिरोली-नारायणपूर सीमेवरील कोपर्शी जंगल परिसरात गडचिरोली विभागाचे गट्टा दलम, कंपनी क्रमांक 10 आणि इतर माओवादी दबा धरून बसल्याची गोपनीय माहिती मिळाली. त्यानंतर अपर पोलीस अधीक्षक अभियान एम. रमेश यांच्या नेतृत्वाखाली सी-६० ची १९ पथके आणि सीआरपीएफ QAT ची ०२ पथके जंगलात रवाना करण्यात आली.

प्रचंड पावसादरम्यान दोन दिवस पोलीस पथके आज सकाळी जंगल परिसरात पोहोचून शोध मोहीम राबवली. तर माओवाद्यांनी पोलीस पथकांवर अंदाधुंद गोळीबार केला. यात पोलीस पथकाने प्रभावी प्रत्युत्तर दिलं.

आठ तास चाललेल्या चमकीनंतर परिसरात शोध घेण्यात आला. त्यावेळी ४ जहाल माओवाद्यांचे मृतदेह आढळले. त्यात १ पुरुष आणि ३ महिलांचे मृतदेह आढळले. तसेच घटनास्थळावरून 01 SLR रायफल, 02 INSAS रायफल आणि 01 .303 रायफल जप्त करण्यात आले आहेत. या भागातील उर्वरित माओवाद्यांचा शोध घेण्यासाठी माओवाद विरोधी अभियान सुरू आहे.