गडचिरोलीत सीआरपीएफ आणि पोलीसांच्या संयुक्त कारवाईत चार माओवादी ठार
१४ लाखांच्या इनामी माओवादींचा खात्मा करून जवानांचे मोठे यश
घटनास्थळावरून रायफल, काडतुसे आणि वॉकी-टॉकी जप्त
जंगल परिसरातील माओवादी हालचालींना मोठा धक्का बसला
गडचिरोली जिल्ह्यात पुन्हा एकदा माओवाद्यांविरोधातील लढाईत सुरक्षा दलाला मोठे यश मिळाले आहे. गडचिरोली पोलीस आणि सेंट्रल रिझर्व्ह पोलीस फोर्स (सीआरपीएफ) यांच्या संयुक्त मोहिमेत झालेल्या चकमकीत चार जहाल माओवादी ठार करण्यात आले आहेत. या कारवाईदरम्यान ठार झालेल्यांमध्ये एक वरिष्ठ पीपीसीएम दर्जाचा कॅडर सदस्य असून उर्वरित तीन महिला माओवादी कार्यकर्त्या आहेत. महाराष्ट्र शासनाने या चौघांवर तब्बल १४ लाख रुपयांचे बक्षीस जाहीर केले होते.
महाराष्ट्र–छत्तीसगड सीमेवरील नारायणपूर जिल्ह्याला लागून असलेल्या गडचिरोलीच्या कोपर्शी जंगल परिसरात ही कारवाई पार पडली. जवळपास ४८ तास चाललेल्या या शोध मोहिमेदरम्यान मंगळवारी पहाटे सुरक्षा दलाला माओवादी हालचालींचा सुगावा लागला. त्यानंतर जवानांनी कोपर्शी जंगल परिसरात सर्च ऑपरेशन राबविले. यावेळी माओवादी आणि सुरक्षा दल यांच्यात तब्बल आठ तास गोळीबार सुरू राहिला. अखेर जवानांच्या प्रत्युत्तरामुळे चार माओवादींना कंठस्नान घालण्यात यश आले. घटनास्थळावर ०१ पुरुष आणि ०३ महिला माओवादी कार्यकर्त्यांचे मृतदेह आढळून आले.
या कारवाईनंतर घटनास्थळावरून मोठ्या प्रमाणात शस्त्रास्त्र व दारूगोळा जप्त करण्यात आला आहे. यामध्ये एक एसएलआर रायफल, दोन इन्सास रायफल, एक .३०३ रायफल, ९२ जिवंत काडतुसे आणि तीन वॉकी-टॉकीचा समावेश आहे. ही शस्त्रे आणि साधने माओवादी संघटनांकडे असलेली महत्त्वाची युद्धसामग्री मानली जाते.
गडचिरोली पोलीस दलाने दिलेल्या माहितीनुसार, माओवाद्यांचा प्रभाव कमी करण्यासाठी आणि जनतेमध्ये सुरक्षिततेची भावना निर्माण करण्यासाठी अशा मोहिमा सातत्याने राबविल्या जात आहेत. यापूर्वीही गडचिरोली जिल्ह्यात सुरक्षा दलाने अनेक मोठ्या प्रमाणावर माओवादी ठार केले होते. या ताज्या चकमकीनंतर जंगल परिसरातील माओवादी हालचालींना मोठा धक्का बसला आहे. या यशाबद्दल गडचिरोली पोलीस आणि सीआरपीएफ दलाचे कौतुक होत असून, स्थानिक पातळीवर जनतेमध्येही दिलासा व्यक्त केला जात आहे.
सकाळ+चे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Marathi news and watch Live TV. Breaking news from Maharashtra, India, Pune, Mumbai, Politics, Entertainment, Sports, Lifestyle at SaamTV. Get Live Marathi news on Mobile. Download the Saam Tv app for Android and IOS.