तुकाराम मुंढे यांनी अन्न व औषध विभागाचे आयुक्तपदाचा कार्यभार हाती घेतल्यापासून एफडीएनं राज्यभरात कारवाईचा धडाका लावालाय. एफडीएनं लातूर जिल्ह्यातील दुकानांवर धाडी टाकल्या आहेत. या धाड सत्रांमुळे रेणापूर येथील अन्नपदार्थ विक्रेत्यांचे धाबे दणाणले आहेत. लातूरमधील रेणापूर येथील प्रसिद्ध 'बेंगलोर अय्यंगार्स बेकरी'वर अन्न सुरक्षा अधिकाऱ्यांनी थेट धाड टाकत एक धडक कारवाई केली आहे. या धडक कारवाईमुळे रेणापूर परिसरातील आणि संपूर्ण जिल्ह्यातील अन्नपदार्थ विक्रेत्यांमध्ये प्रचंड खळबळ उडालीय.

रेणापूरमधील महात्मा गांधी चौक भागात ही बेकरी आहे. अन्न सुरक्षा अधिकाऱ्यांच्या पथकानं बेकरीत धाड टाकताच तेथील भीषण परिस्थिती पाहून अधिकारीही चक्रावलेत. बेकरीमधील अत्यंत गलिच्छ वातावरणात ग्राहकांसाठीचे अन्नपदार्थ बनवले जात असल्याचे अधिकाऱ्यांच्या निदर्शनात आले. या तपासणीदरम्यान चक्क मुदतबाह्य कच्चा माल वापरून बेकरीचे विविध पदार्थ तयार केले जात असल्याचे बाब उघडकीस आली.

या बेकरीमध्ये कोणत्याच प्रकारची स्वच्छता ठेवली जात नसल्याचं लक्षात आलं. बेकरी चालकाचा हा निष्काळजीपणा आणि नियमांचे उल्लंघन पाहता, अन्न सुरक्षा अधिकाऱ्यांनी कडक या बेकरीचा अन्न व्यवसाय परवाना तात्काळ निलंबित करण्यात आला. तसेच या बेकरीचा संपूर्ण व्यवसाय तातडीने बंद पाडत प्रशासनाच्या वतीने दुकान सील करण्यात आले आहे.

अन्न सुरक्षा अधिकाऱ्यांनी घेतलेल्या या आक्रमक निर्णयामुळे रेणापूरमधील इतर व्यावसायिकांचेही धाबे दणाणले आहे. नागरिकांच्या आरोग्याशी खेळ करणाऱ्या कोणत्याही अन्नपदार्थ विक्रेत्याची गय केली जाणार नाही, असा स्पष्ट इशारा या कारवाईच्या माध्यमातून प्रशासनाने दिला आहे.