नेहमीच कोणत्या ना कोणत्या विधानावरून चर्चेत असलेल्या भाजप खासदार कंगना आता शिक्षणमंत्री होणार असल्याचा दावा करण्यात आलाय. कंगनाने मोदींकडेच शिक्षणमंत्री होण्याची इच्छा दर्शवली असल्याचा दावा केलाय. तिच्या नावाची एक पोस्ट व्हायरल होतेय. पण, खरंच कंगनाने मोदींना विनंती केलीय का?

या पोस्टमध्ये लिहिण्यात आलं आहे की, मी नरेंद्र मोदींना विनंती करते की, त्यांनी मला भारताची शिक्षणमंत्री म्हणून नियुक्त करावे. मला शिक्षणाचे महत्त्व समजते, कारण भारताला 2014 मध्ये स्वातंत्र्य मिळाले हे सत्य लोकांना दाखवणारी मी पहिली व्यक्ती होते. माझ्याकडे नीटसाठीही एक योजना आहे.

तसंच आणखी या मेसेजमध्ये लिहिण्यात आलंय. जो कोणी विद्यार्थी माझा चित्रपट थिएटरमध्ये पाहिल त्याला नीटमध्ये अतिरिक्त गुण मिळतील. यामुळे माझ्या फ्लॉप चित्रपटांची मालिका संपेल आणि हा सर्वांसाठीच फायदेशीर ठरेल.अशी पोस्ट आता व्हायरल होतेय.पण, खरंच कंगनाने मोदींकडे शिक्षणमंत्री होण्याची इच्छा दर्शवलीय का? तिने ही पोस्ट केलीय का? याची माहिती मिळवण्यासाठी आम्ही कंगनाचे सोशल मीडिया हॅन्डल्स तपासून पाहिले.मात्र, आम्हाला अशी पोस्ट कुठेही सापडली नाही. मग ही पोस्ट नक्की कुठून आली?

जेनझींना गटारछाप म्हटल्यावरून कंगना चर्चेत. तिच्यावर टीकाही झाली. त्यामुळे कंगनाच्या नावाने असे मेसेज व्हायरल केले जातायत. चुकीचे मेसेज व्हायरल करून सोशल मीडियावरून दिशाभूल केली जातेय. मात्र, कंगनाने अशी कोणतीही मागणी केलेली नाही. त्यामुळे आमच्या पडताळणीत कंगना शिक्षणमंत्री होणार असल्याचा दावा असत्य ठरलाय.