Baramati news updates : महाराष्ट्राचे उपमुख्यमंत्री अजित पवार यांच्या विमान अपघाती निधनाला एक महिना होत असताना घातपाताचा संशय बळावला आहे. VRS कंपनीच्या विमानाने प्रवास करत असताना अजित पवार यांचे बारामतीमध्ये अकाली निधन झाले. या दुर्दैवी घटनेनंतर एकनाथ शिंदे आणि शिवसेना आमदारांनी त्या कंपनीबाबत मोठा निर्णय घेतला आहे. VRS कपंनीसाठी हा मोठा धक्का मानला जात आहे. पाहूयात नेमकं हे प्रकरण आहे तरी काय? एकनाथ शिंदे आणि शिवसेनेच्या नेत्यांनी काय निर्णय घेतला?

महाराष्ट्राचे उपमुख्यमंत्री एकनाथ शिंदे आणि शिवसेना पक्षाच्या आमदार, खासदारांनी VRS कंपनीची विमाने न वापरण्याचा निर्णय घेतला आहे. व्हीएसआर लिअरजेट विमानाने प्रवास करताना अजित पवार यांचं अपघाती निधन झाले होते. त्यानंतर रोहित पवार यांच्याकडून गंभीर आरोप करण्यात आला. अनेकांकडून संशय व्यक्त करत चौकशीची मागणी करण्यात आली. राज्याचे मुख्यमंत्री देवेंद्र फडणवीस यांनाही या प्रकरणाच्या चौकशीचे आदेश दिले. केंद्रीय नागरी विमान वाहतूक महासंचालनालयाने (डीजीसीए) ४ व्हीएसआर विमानाच्या उड्डाणावर बंदी घातली असून चौकशी करण्यात येत आहे.

कॅबिनेट मंत्री संजय शिरसाट यांनी VRS कंपनी संदर्भात महत्त्वाची माहिती दिली. अजित दादांच्या अपघातानंतर शिंदे गटातील आमदारांनी उपमुख्यमंत्री एकनाथ शिंदे यांची भेट घेऊन व्हीएसआर कंपनीची सेवा वापरू नये, अशी विनंती केली होती. ही विनंती एकनाथ शिंदे यांनी मान्य केली आहे, अशी माहिती संजय शिरसाट यांनी दिली आहे.

दिवंगत उपमुख्यमंत्री अजित पवार हे VRS कंपनीच्या विमानाने बारामतीला निघाले होते, त्यावेळी अकाली निधन झाले होते. व्हीआरएस कंपनीही राजधानी दिल्लीमधील आहे. ते विमान व्हीएसआर व्हेंचर्स प्रायव्हेट लिमिटेडचे ​​लिअरजेट ४५एक्सआर (व्हीटी-एसएसके) मॉडेलचे होते. बारामतीत झालेल्या विमान अपघातात अजित पवार यांच्यासह ५ जणांचा मृत्यू झाला. अजित पवारांच्या अकाली निधनानंतर डीजीसीएने व्हीएसआर व्हेंचर्सची चार विमाने ग्राउंडिंग केली असून ऑपरेशनवर बंदी घालत मोठी कारवाई केली आहे. बारामती येथे झालेल्या विमान अपघातानंतर केलेल्या विशेष ऑडिट आणि देखरेखीदरम्यान आढळलेल्या गंभीर त्रुटींच्या आधारे ही कारवाई करण्यात आल्याचे समजतेय.