नागपूरातील एका सिनेमागृहात पुष्पा २ चित्रपट पाहत असताना, खून आणि पदार्थ तस्करी प्रकरणात वाँटेड असलेल्या आरोपीला अटक करण्यात पोलिसांना यश आलं आहे. विशाल मेश्राम असं आरोपीचं नाव असून, पोलिसांनी त्याला सिनेमागृहातूनच अटक केलं आहे. सिनेमागृहात आरोपीला अटक केल्यानंतर प्रेक्षकांना धक्काच बसला. मात्र, अटक केल्यानंतर पोलिसांनी 'आता प्रेक्षकांना चित्रपटाचा आनंद लुटता येईल', असे सांगितले.

पाचपावली पोलीस ठाण्याच्या एका अधिकाऱ्यानं रविवारी सांगितले की, विशाल मेश्राम १० महिन्यांपासून फरार होता. गुडांचे खून आणि अंमली पदार्थांच्या तस्करीसह त्याच्यावर २७ गुन्हे दाखल आहेत. यासह आरोपीने यापूर्वी पोलिसांवरही हल्ले केलेले आहेत. आरोपी वापरत असलेल्या स्पोर्ट्स युटिलिटी वाहन (एसयुव्ही)वरही सायबर पाळत ठेवून होते.

कु्ख्यात आरोपी विशाल मेश्राम हा साथीदारांसोबत पुष्पा २ चित्रपट पाहण्यासाठी सिनेमागृहात गेला होता. याची माहिती पोलिसांना मिळाली. पोलिसांनी पुष्पा २ चित्रपटाची तिकीट खरेदी केली. नंतर त्याच्या वाहनाच्या टायरमधून हवा काढली. जेणेकरून आरोपी पुन्हा हातातून निसटू नये आणि पलायन करू नये. जेव्हा पोलीस सिनेमागृहात दाखल झाले, तेव्हा आरोपी चित्रपट बघण्यात पूर्णपणे मग्न होता.

आरोपी बसलेल्या सीटच्या मागील बाजूस पोलीस बसले होते. तसेच बाकीचे पोलीसपथक सिनेमागृहाच्या बाहेर तैनात होते. आतापर्यंतच्या आरोपीची पार्श्वभूमी पाहता, तो पोलिसांवर हल्ला करतो. त्यामुळं पोलिसांनी विशेष खबरदारी घेऊन आरोपीला अटक केलं आहे. मेश्राम सध्या नागपूर मध्यवर्ती कारागृहात असून, त्याला लवकरच नाशिक कारागृहाच हलविण्यात येणार असल्याचं पोलिसांनी सांगितलं.