Sangli News : राष्ट्रवादी कॉंग्रेसचे तालुकाध्यक्ष आणि शिवसेना शिंदे गटाचे नेते या दाेघांत सांगली जिल्हा मध्यवर्ती सहकारी बॅंकेतच वादावादी झाले. हा प्रकार जिल्हा बॅंकेच्या अध्यक्षांच्या दालनात झाल्याने एकच खळबळ उडाली. दरम्यान हे प्रकरण आता पाेलिस ठाण्यापर्यंत पाेहचले आहे. (Maharashtra News)

आटपाडी येथील माणगंगा सहकारी साखर कारखान्यावरुन जिल्हा मध्यवर्ती सहकारी बॅंकेचे अध्यक्ष आमदार मानसिंगराव नाईक (mansingrao naik) यांच्यासमोर शिवसेना शिंदे गटाचे संचालक तानाजी पाटील (tanaji patil) आणि राष्ट्रवादी कॉंग्रेसचे तालुकाध्यक्ष हणमंतराव देशमुख (hanmantrao deshmukh) यांच्यात खडाजंगी झाली. या वादावादीची चर्चा बॅंकेच्या वर्तुळात अवघ्या काही क्षणांत पसरली.

जिल्हा मध्यवर्ती बॅंकेच्या संचालक मंडळाची साेमवारी दुपारच्या सुमारास बैठक होती. या बैठकीसाठी संचालक आले होते. अध्यक्ष आमदार मानसिंगराव नाईक यांच्या कक्षात चर्चा करीत बसले होते.

प्राप्त माहितीनूसार हणमंतराव देशमुख यांनी बॅंकेच्या ताब्यात असलेला माणगंगा साखर कारखाना संचालक पाटील यांच्याशी सबंधित कंपनीला चालविण्यास देण्याबाबत तक्रार केली आहे. कोणत्या नियमाने कारखाना दिला अशी विचारणा केली.

यावरुन संचालक तानाजी पाटील यांनी अध्यक्ष मानसिंग नाईक यांच्या दालनात बसलेल्या हणमंतराव देशमुख यांना का माझ्याबद्दल तक्रारी करतो असे म्हणत शिवीगाळ करायला सुरुवात केली आणि वादावादी सुरू झाली. एकमेकांच्या अंगावर धाऊन जाण्याचा प्रकारही घडला.

बँकेचे अध्यक्ष मानसिंग नाईक यांनी मध्यस्थी करुन वाद मिटवण्याचा प्रयत्न केला. दरम्यान बँकेतून बाहेर पडल्यानंतर हणमंतराव देशमुख यांनी पाटील यांच्याविरुध्द जीवे मारण्याची धमकी दिल्याची तक्रार पोलीस अधिक्षकांकडे केली आहे.

Edited By : Siddharth Latkar