बालाजी सुरवसे 

धाराशिव : तुळजाभवानी मंदिर संस्थांकडून भाविकांच्या सुविधेसाठी ऑनलाईन सशुल्क दर्शन पासची सुविधा सुरु करण्यात आली आहे. मात्र या सुविधेस मंदिर पुजारींचा विरोध असून संस्थानकडून सुरू करण्यात आलेली ऑनलाइन सशुल्क दर्शन पास सुविधा रद्द करण्याची मागणी तुळजापूर शहरातील काही पुजाऱ्यांनी मंदिर संस्थानकडे केली आहे.

महाराष्ट्राची कुलस्वामिनी आई तुळजाभवानी मातेचे (Tuljabhavani Mandir) लवकर दर्शन व्हावे यासाठी मंदिर संस्थांकडून सशुल्क दर्शन पासची सुविधा केली आहे. दरम्यान मंदिर संस्थानच्या वतीने आता २२ जुलैपासून भाविकांसाठी ५०० रुपये सशुल्क दर्शन पास ऑनलाइन सुविधा सुरु करण्यात येणार आहे. यासाठी मंदिर संस्थानने मोबाइल अँप देखील तयार केले आहे. या अँप द्वारे मंदिरात येणाऱ्या भाविकांना ५०० रुपये शुल्क पेड करून दर्शनासाठी ऑनलाईन पास काढता येणार आहे. अर्थात यात भाविकांचा वेळ देखील वाचणार आहे. 

मात्र मंदिर संस्थानकडून सुरु करण्यात (Dharashiv News) येत असलेली ही सुविधा रद्द करण्याची मागणी केली जात आहे. यात मंदिर पुजाऱ्यांच्या मते या सुविधेमुळे भाविकांचा पुजाऱ्यांशी संपर्क होणार नाही. तसेच भाविकांना पारंपरिक कुलधर्म कुलाचार पूजेला मुकावे लागणार आहे. यामुळे पुजारी बांधवांनी ही सुविधा रद्द करण्याची मागणी; एका निवेदनाद्वारे मंदिर संस्थानचे व्यवस्थापक तहसीलदार यांच्याकडे करण्यात आली आहे.