लक्ष्मण हाकेंनी थेट धोबी आणि नाभिक समाजाला SC आरक्षणाची मागणी करुन नव्या वादाला तोंड फोडलंय. तर एससी आरक्षणाकडे पाहिलं तर डोळे काढण्याचा इशाराच ऑल इंडिया पँथर सेनेनं दिलाय.

खरंतर मराठा आरक्षणासाठी हैदराबाद गॅझेट लागू करण्याचा जीआर सरकारने काढला आणि त्याचाच आधार घेत राज्यात आरक्षणासाठी स्पर्धा सुरु झाली.. आधी बंजारा समाजाने आदिवासी आरक्षणाची मागणी केली. तर त्यानंतर धनगर समाजही आक्रमक झालाय...हे कमी होतं की काय लक्ष्मण हाकेंनी आता धोबी आणि नाभिक समाजाच्या आरक्षणाच्या मुद्दा पुढे आणल्यानं आरक्षणाचा तिढा आणखीच वाढलाय. खरं तर 15 राज्यं आणि केंद्र शासित प्रदेशात धोबी समाज हा SC प्रवर्गात आहे. याचाच दाखला देत धोबी समाजाकडून SC आरक्षणाची मागणी केली जातेय.. मात्र कोणत्या राज्यात धोबी समाज SC प्रवर्गात आहे? पाहूयात...

कोणत्या राज्यात धोबी समाज SC प्रवर्गात

आंध्र प्रदेश

बिहार

आसाम

हिमाचल प्रदेश

झारखंड

मध्य प्रदेश

मेघालय

ओडिशा

राजस्थान

त्रिपुरा

उत्तर प्रदेश

पश्चिम बंगाल

मिझोराम

उत्तराखंड

दिल्ली

तर दुसरीकडे नाभिक समाजही 1985 पासून आसाम, उत्तर प्रदेश, आंध्र प्रदेश, मध्य प्रदेश आणि बिहार या राज्यांचा दाखला देत SC आरक्षणाची मागणी केली जातेय.. मात्र या वादावर अखेर सरकारने मौन सोडत केंद्राकडे बोट दाखवलंय..

खरंतर महाराष्ट्रात ओबीसी प्रवर्गात 374 जाती आहेत.. त्यात नाभिक आणि धोबी जातींचाही समावेश होतो..आता या जाती स्वतःला मागास घोषित करावं, यासाठी मैदानात उतरण्याच्या तयारीत आहेत..राज्यातील प्रत्येक जात स्वतःला मागास सिद्ध करण्याचा प्रयत्न करत असल्याचं चित्र राज्यात दिसू लागलं आहे,यामागे आवाक्याबाहेर चाललेलं शिक्षण आणि सरकारी नोकरी हे कारण असल्याचं समोर आलंय..

वेगवेगळ्या जाती अशाप्रकारे एकमेकांसमोर उभ्या ठाकल्या तर राज्याची सामाजिक वीण उसवल्याशिवाय राहणार नाही. आणि ती कायम ठेवायची असेल तर सरकारने योग्य तोडगा काढायला हवा.. नाहीतर महाराष्ट्राची अधोगती ठरलेलीच.....