नवनीत तापाडिया, साम टीव्ही

Chhatrapati Sambhajinagar Crime News: छत्रपती संभाजीनगर शहरातून एक धक्कादायक घटना समोर आली आहे. डोकेदुखीच्या वेदना असह्य झाल्यामुळे एका तरुणीने घरातील सिलिंग फॅनला ओढणी बांधून गळफास घेत आपली जीवनयात्रा संपवली. ही दुर्देवी घटना मंगळवारी दुपारसच्या सुमारास शहरातील हर्सूल सावंगी परिसरात घडली. या घटनेनं हळहळ व्यक्त होत आहे.

प्रिया रमेश बुजडे या तरुणीचे नाव आहे. ती शहरातील (Chhatrapati Sambhajinagar) एका विद्यालयात फुड टेक्नॉलॉजी अभ्यासक्रमाची विद्यार्थिनी होती. प्राप्त माहितीनुसार, गेल्या 20 दिवसांपासून प्रियाचे डोके दुखत होते. तिच्यावर रुग्णालयात उपचार देखील करण्यात आले.

मात्र, डोकेदुखीच्या वेदना असह्य झाल्यामुळे प्रियाने घरातील पंख्याला ओढणी बांधून गळफास घेतला. दरम्यान, आत्महत्येपूर्वी प्रियाने एक चिठ्ठी देखील लिहून ठेवली. आई-बाबा मला माफ करा मी चुकीचे करतेय, डोकेदुखी असह्य झाल्याने मी आत्महत्या करत आहे. असं प्रियाने चिठ्ठीत नमुद केलं.

दरम्यान, प्रियाच्या कुटुंबियांनी या घटनेची माहिती पोलिसांना (Police) दिली. घटनेची माहिती मिळताच हर्सूल तातडीने घटनास्थळी दाखल झाले. पोलिसांनी प्रियाचा मृतदेह ताब्यात घेतला असून शवविच्छेदनासाठी पाठवला आहे. गेल्या काही दिवसांपासून तरुणांमध्ये आत्महत्येचे प्रमाण वाढल्याने चिंता व्यक्त केली जात आहे.

Edited by - Satish Daud