Influencer Death: प्रसिद्ध सोशल मीडिया इन्फ्लुएन्सरचं निधन; अवघ्या २६ व्या वर्षी घेतला अखेरचा श्वास

Influencer Death: ब्राझीलमधील प्रसिद्ध सोशल मीडिया इन्फ्लुएन्सर डेरलेया आल्वेस हिचा अवघ्या 26 व्या वर्षी कॉस्मेटिक सर्जरीनंतर झालेल्या गुंतागुंतीमुळे मृत्यू झाला आहे. द टाईम्स ऑफ इंडियाने दिलेल्या वृत्तानुसार, कॉस्मेटिक सर्जरीनंतर तिची प्रकृती खालावली आणि अखेर 28 फेब्रुवारी रोजी तिचे निधन झाले.

डेरलेयाने अलीकडेच स्तनवृद्धी (ब्रेस्ट ऑग्मेंटेशन) सर्जरी केली होती. या सर्जरीनंतर तिला तीव्र पोटदुखीचा त्रास सुरू झाला. वेदना असह्य झाल्यानंतर तिला तातडीने ब्राझीलमधील Marabá हॉस्पिटलमध्ये दाखल करण्यात आले. डॉक्टरांनी तिच्यावर उपचार सुरू केले, मात्र तिची प्रकृती अधिकच गंभीर होत गेली. डेरलेयाची बहीण जेसिका आल्वेस हिने सोशल मीडियावर पोस्ट करत बहिणीला श्रद्धांजली अर्पण केली.

हॉस्पिटलमध्ये उपचारादरम्यान तिच्यावर अनेक सर्जरी कराव्या लागल्या. आतड्यांमध्ये निर्माण झालेल्या समस्येवर सर्जरी करण्यात आली तसेच तीचे अंडाशय काढून टाकण्यात आले. डॉक्टरांच्या अथक प्रयत्नांनंतरही तिची तब्येत सुधारली नाही. हॉस्पिटलमध्ये डॉक्टरांनी प्राथमिक माहितीनुसार जन्मजात आतड्यांच्या विकारामुळे परिस्थिती अधिक बिघडली असावी, अशी शक्यता व्यक्त केली आहे. मात्र याबाबतचे पोस्टमार्टम रिपोर्टमध्ये कळेल असे ते म्हणाले.

सोशल मीडियावर डेरलेयाचे सुमारे 27 हजारांहून अधिक फॉलोअर्स होते. ती आपल्या दैनंदिन आयुष्यातील घडामोडी, फॅशन आणि वैयक्तिक अनुभव चाहत्यांसोबत शेअर करत असे. तिच्या अकाली निधनामुळे तिच्या चाहत्यांना आणि कुटुंबीयांना मोठा धक्का बसला आहे.