छत्रपती संभाजीनगरमध्ये देवगाव रंगारी येथील एका शाळेत किरकोळ कारणावरून धक्कादायक घटना घडली आहे. शाळेतील दहावीच्या वर्गात शिकणाऱ्या एका अल्पवयीन विद्यार्थ्याने वर्गातीलच चार विद्यार्थ्यांवर पॉकेट चाकूने वार केले. या हल्ल्यात चार विद्यार्थी जखमी झाले असून, त्यातील एका विद्यार्थ्याची प्रकृती गंभीर असल्याने त्याला उपचारासाठी घाटी रुग्णालयात हलवण्यात आले आहे. सदर घटना गुरुवारी सकाळच्या सुमारास घडली असून शाळा प्रशासनाच्या सुरक्षिततेवर प्रश्नचिन्ह उपस्थित केले जात आहेत.

मिळालेल्या माहितीनुसार, नेहमीप्रमाणे काल म्हणजे ६ ऑगस्ट रोजी गुरुवारी शाळा भरली. काही तासानंतर साडेअकराच्या सुमारास शाळेत जेवणाची सुट्टी झाली होती. जेवणानंतर मुलांनी हात धुण्यासाठी लाईन लावली. यादरम्यान एका विद्यार्थ्याचा धक्का त्याच्या वर्गातील काही मुलांना लागला. मला धक्का का दिला यावरून मुलांमध्ये वाद सुरु झाला. मात्र पाहता पाहता क्षुल्लक वादाचे रूपांतर जीवघेण्या हल्ल्यात झाले.

या वादातून संतापलेल्या विद्यार्थ्याने ‘थांबा, तुम्हाला बघतोच,’ अशी धमकी दिली आणि तो वर्गाच्या दिशेने निघून गेला. काही वेळातच तो स्वतःसोबत पॉकेट चाकू घेऊन परतला. विद्यार्थ्याने खिशातील चाकू काढून ४ विद्यार्थ्यांवर हल्ला केला. हल्ल्यात दोन विद्यार्थ्यांच्या उजव्या दंडावर गंभीर दुखापत झाली. एका विद्यार्थ्याच्या उजव्या पायावर, तर दुसऱ्याच्या पाठीवर वार झाला. रक्तबंबाळ अवस्थेतील विद्यार्थ्यांना पाहून शाळेत एकच खळबळ उडाली.

शाळा प्रशासनाने तातडीने जखमी विद्यार्थ्यांना गावातील ग्रामीण रुग्णालयात दाखल केले. प्राथमिक उपचारानंतर गंभीर जखमी विद्यार्थ्याला घाटी रुग्णालयात हलवण्यात आले. दरम्यान, पोलिसांनी तत्परतेने कारवाई करत हल्ला करणाऱ्या अल्पवयीन विद्यार्थ्याला ताब्यात घेतले आहे. या घटनेमुळे शाळा परिसरात पालकांमध्येही चिंता व्यक्त होत आहे.