छत्रपती संभाजीनगरमध्ये धक्कादायक घटना घडली आहे. संभाजी नगरमध्ये भर दिवसा एका तरुणाचे अपहरण केले आहे. छत्रपती संभाजी नगरमधील मुख्य चौकांपैकी एक म्हणजे सिटी चौक. याच चौकात भरदिवसा सराफा कामगार तरुणाचे अपहरण करण्यात आले आहे. या घटनेने संपूर्ण छत्रपती संभाजीनगरमध्ये भीतीचे वातावरण होते. परंतु पोलिसांच्या मदतीने या तरुणाला शोधण्यात यश आले.

सराफा कामगाराचे भरदिवसा अपहरल झाल्याने सर्वत्र खळबळ उडाली होती. या संपूर्ण घटनेची माहिती पोलिसांना दिली. पोलिसांनी लगेचच घटनास्थळ गाठले. यावेळी अपहरण करणाऱ्या एका व्यक्तीचा मोबाईल पडला होता. याच मोबाईलवरुन पोलिसांनी फोन केला. त्या मोबाईल नंबरचे लोकेशन मिळवण्यात पोलिसांना यश आले आणि त्यांनी या तरुणाची सुटका केली.

पैठण तालुक्यातील दावरवाडी येथील तरुणाने संभाजी नगरमध्ये राहणाऱ्या एका व्यक्तीला सोन्याचे दागिने घेण्यासाठी ८ लाख रुपये दिले होते. त्याने आधी सोन्याचे दागिने देतो म्हणून सांगितले. मात्र, त्या व्यक्तीने दागिने दिलेच नाही. दावरवाडी येथील तरुणाने पैसे परत मिळवण्यासाठी अनेकदा कॉल केले. त्यांनी तब्बल ६ महिने त्या सराफा कामगाराला फोन केला.

दरम्यान, वारंवार फोन करुन, पाठपुरवठा करुनदेखील तो व्यक्ती पैसे देत नव्हता. त्यामुळे त्याने या तरुणाच्या अपहरणाचा कट रचला. ठरल्याप्रमाणे त्या व्यक्तीने काही साथीदारांच्या मदतीने अपहरणाचा कट आखला. ही घटना सिटी चौक परिसरातील मीना फंक्शन हॉलच्या मागील गल्लीमध्ये घडली. याप्रकरणी रात्री उशिरा सिटी चौक ठाण्यात गुन्हा दाखल करण्यात आला आहे.