काँग्रेसमधील अंतर्गत वादामुळे चंद्रपूरमधील राजकारणात वादळ उठलंय. येथील माजी मंत्री विजय वडेट्टीवार आणि खासदार प्रतिभा धानोरकर यांच्यातील वाद आता दिल्ली दरबारी गेलाय. विजय वडेट्टीवार यांनी त्यांच्या 18 नगरसेवकांसह दिल्ली गाठली आहे. यामुळे चंद्रपुरातील महापौरपदाच्या वादाचा निकाल आता दिल्लीत लागणार अशी चर्चा सुरू झालीय. दरम्यान चंद्रपुरात सर्वात मोठा पक्ष ठरुनही काँग्रेसमधील अंतर्गत वादामुळे सत्ता स्थापन करण्यात अडथळे निर्माण होत आहे.

चंद्रपुरात काँग्रेसने सर्वाधिक २७ जागा जिंकल्या आहेत आणि काँग्रेस समर्थित जनविकास सेनेच्या तीन नगरसेवकांनी त्यांनी पाठिंबा दिलाय. त्यामुळे बहुमतासाठी केवळ चार नगरसेवकांची गरज आहे. इतकं सोप सत्तेचं गणित असतानाही काँग्रेसला सत्ता स्थापन करता येत नाहीये. त्यामागील अडचण ठरलीय विजय वडेट्टीवार आणि प्रतिभा धानोरकर यांच्यातील वाद.

काँग्रेसचे प्रदेशाध्यक्ष हर्षवर्धन सपकाळ यांनीही यात मध्यस्थी करण्याचा प्रयत्न केला. पण त्यांनाही हा वाद सोडवण्यात यश आलं नाही. यामुळे महापौरपदावर अंतिम तोडगा निघाला नाहीये. त्यामुळेच विजय वडेट्टीवार यांनी त्यांच्या १८ समर्थक नगरसेवकांना घेऊन दिल्ली गाठली आहे. विजय वडेट्टीवार हे त्यांच्या नगरसेवकांसह काँग्रेसचे सचिव केसी वेणुगोपाळ यांची भेट घेणार असल्याची माहिती मिळालील. त्यामुळे काँग्रेसच्या केंद्रीय नेतृत्वाला आता या वादामध्ये तोडगा काढता येतो का याकडे सर्वांचं लक्ष लागलंय.

दरम्यान, वडेट्टीवार-धानोरकर वादाचा फायदा घेऊन सत्ता स्थापन करता येईल का याची भाजपनेही चाचपणी केलीय. भाजपकडे २३ नगरसेवक आहेत. पण त्यांना इतर पक्षांचा पाठिंबा आवश्यक आहे. यात उद्धव ठाकरे गटाचे ६ आणि वंचितच्या दोन नगरसेवकांनी, तसेच अपक्षांनी भाजपला पाठिंबा दिला ते सत्ता स्थापन करू शकतात.