चंद्रपूर : चंद्रपूर जिल्ह्यातील चक पिरंजी या गावात ग्रामसभेने अनोखा ठराव पारित केला आहे. गावात जो कुणी अवैध दारू विक्री आणि धंदे करेल; त्याला कोणत्याही शासकीय योजनेचा लाभ देण्यात येणार नसल्याचा ठराव केला आहे. 

चंद्रपूर (Chandrapur) जिल्ह्यातील चकपिरंजी हे गाव सावली तालुक्यात असून चंद्रपूर- गडचिरोली महामार्गावर आहे. या गावात अवैध दारू विक्री मोठ्या प्रमाणात होत असून, यामुळे गावकरी त्रस्त आहेत. याबाबत पोलिसात देखील तक्रार देण्यात आली. मात्र कारवाई झाली नाही. त्यामुळे गावकऱ्यांनी ग्रामसभेत (Gram Sabha) निवेदन देत दारू विक्रीवर आळा घालण्याची मागणी केली. नागरिकांची ही मागणी मान्य करीत ग्रामसभेने कठोर निर्णय घेतला. 

तर अधिकारी. पदाधिकाऱ्यावरही कारवाई 

यात गावातील जो कुणी अवैधरीत्या दारूविक्री करेल, त्याला एकाही शासकीय योजनेचा लाभ दिला जाणार नाही. कोणतेही प्रमाणपत्र दिले जाणार नाही. ग्रामसभेच्या या ठरावाविरोधात जर कुणी अधिकारी किंवा पदाधिकाऱ्याने कृत्य केल्यास त्याच्यावर कारवाई केली जाईल; असाही ठराव सर्वानुमते संमत करण्यात आला. त्यामुळे अवैध दारू विक्रेत्यांचे धाबे दणाणले आहे. असा ठराव घेणारी जिल्ह्यातील ही पहिलीच ग्राम पंचायत आहे.