Nanded News : सोयाबीनच्या शेंगा उकडून खाल्ल्याने १० जणांना विषबाधा, १४ वर्षीय मुलीचा मृत्यू

संजय सूर्यवंशी

नांदेड : शेतातून आणलेल्या सोयाबीनच्या शेंगा उकळून खाल्ल्यानंतर नांदेडच्या सिडको भागात राहणाऱ्या दहा जणांना विषबाधा झाली. दरम्यान उपचारादरम्यान एका १४ वर्षीय मुलीचा मृत्यू झाल्याची घटना घडली आहे. बाकीच्यांवर रुग्णालयात उपचार सुरु असून त्यांची प्रकृती स्थिर असल्याचे सांगण्यात येत आहे. 

नांदेडच्या (Nanded) नेरली गावात दूषित पाण्यामुळे ७०० लोकांना विषबाधा झाली होती. त्यानंतर आता दुसरा धक्कादायक प्रकार पुढे आला आहे. यात नांदेड शहरातील सिडको भागात राहणाऱ्या परिवारातील ८ ते १० जणांनी बाभुळगाव परिसरातून सोयाबीनच्या शेंगा आणल्या होत्या. त्या शेंगा त्यांनी रात्री उकडून खाल्ल्या. शेंगा खाल्ल्यानंतर रात्री सर्वांना मळमळ होऊ लागली. त्रास जाणवत असल्याने लागलीच दहा जणांना नांदेडच्या शासकीय रुग्णालयात दाखल करण्यात आले. 

दरम्यान यातील मीरा नामदेव खानजोडे (वय १४) या मुलीचा उपचारा दरम्यान मृत्यू झाला. यामुळे खळबळ उडाली आहे. तर विषबाधा झालेल्या अन्य ९ जणांची प्रकृती स्थिर आहे. त्याच्यावर शासकीय रुग्णालय विष्णुपुरी येथे उपचार सुरू आहेत.