- रणजीत माजगांवकर / विजय पाटील

नागपूरहून गोव्याला जाण्यासाठी पर्यायी मार्ग असताना शक्तिपीठ महामार्गाचा अट्टाहास का? सरकारनं रस्ता रद्द करावा अन्यथा आम्ही मंत्र्यांसह सरकारमधील नेत्यांना गाव बंदी, जिल्हा बंदी करू असा इशारा शक्तीपीठ महामार्ग विरोधी संघर्ष समितीचे समन्वयक गिरीश फोंडे यांनी सरकारला दिला आहे.

गिरीश फोंडे म्हणाले मुख्यमंत्री एकनाथ शिंदे यांनी शक्तिपीठ महामार्गाची फेर आखणी करु असे म्हटले आहे. त्याचा देखील आमचा ठाम विराेध आहे. हा रस्ता रद्दच करा अशी आमची भूमिका आहे. शक्तीपीठ महामार्ग घालवायचा असेल तर सरकार घालवलं पाहिजे याच भूमिकेत आम्ही आहाेत असेही फाेंडेंनी नमूद केले.

फाेंडे पुढे बाेलताना म्हणाले मुख्यमंत्री म्हणतात हे जनतेचे सरकार आहे मात्र ते जनतेचे नसून कंत्राटदारांचे सरकार असून जनतेच्या पैशाचा चुराडा करणारा हा महामार्ग आहे. नागपूरहून गोव्याला जाण्यासाठी पर्यायी मार्ग असताना या महामार्गाचा अट्टाहास का? असा सवाल करत सरकारनं हा रस्ता रद्द करावा अन्यथा आम्ही त्यांना गाव बंदी आणि जिल्हा बंदी करू असा इशारा देखील फाेंडेंनी दिला.

शक्तिपीठ महामार्गवरुन धैर्यशील मानेंचा सरकारला घरचा आहेर

शक्तिपीठ महामार्ग होणार आहे. पण हा शक्तीपीठ महामार्ग शक्ती वाढवणारा आहे का शक्ती काढून घेण्याचा हा महामार्ग आहे का. हे काही कळेना झाले आहे. पण देवांच्या नावाखाली आमच्या घरा वर कोण्ही नांगर फिरवत असेल तर देव सुद्धा त्याला माफ करणार नाही अशी टीका कोल्हापूर हातकणंगले मतदार संघातील खासदार धैर्यशील माने यांनी करत सरकारला घरचा आहेर दिला आहे.

आज (शनिवार) शक्तिपीठ महामार्गाला विरोध करण्यासाठी काँग्रेस पक्षातर्फे सांगलीच्या जिल्हाधिकारी कार्यालयासमोर धरणे आंदोलन करण्यात येत आहे. या आंदोलनाला पाठिंबा म्हणून धैर्यशील माने उपस्थित होते. यावेळी काँग्रेसचे विश्वजीत कदम अपक्ष उमेदवार विशाल पाटील आणि काँग्रेसचे नेते या ठिकाणी आंदोलन करत आहेत.

Edited By : Siddharth Latkar