संजय जाधव, बुलढाणा

वाढत्या तापमानामुळे बुलढाणा जिल्ह्यातही आता भीषण पाणीटंचाईचं संकट गडद होत चाललं आहे. जिल्ह्यात वेगवेगळ्या प्रकल्पात फक्त अकरा टक्के उपयुक्त जलसाठा शिल्लक असून साधारणतः २८ दिवस पुरेल एवढाच जलसाठा शिल्लक आहे.

त्यामुळे जिल्ह्यातील सात तालुक्यात ६५ गावांना ६७ टँकरद्वारे पाणीपुरवठा होत आहे. सध्या तालुक्याच्या ठिकाणी कुठे ८ दिवसानंतर तर कुठे १५ दिवसानंतर पाणीपुरवठा केला जात आहे. सुदैवाने जिल्ह्यात कुठेही चारा संकट अद्यापही उद्भवलेलं नाही.

बुलढाणा जिल्ह्यातही दिवसेंदिवस पाणीटंचाईच्या संकटात वाढ होताना दिसत आहे. जिल्ह्यातील मोठ्या तीन प्रकल्पात फक्त ११ टक्के उपयुक्त जलसाठा उरलेला आहे. हा जलसाठा पुढील २८ दिवस पुरेल एवढाच आहे. मात्र सध्याही जिल्ह्यातील सात तालुक्यातील ६५ गावांना ६७ टँकरद्वारे पाणीपुरवठा केला जात आहे.

आगामी काळात लवकर पाऊस पडला नाही तर, जिल्ह्यातील पाणीटंचाईचं संकट मोठ्याप्रमाणात उद्भवणार आहे. सुदैवाने जिल्ह्यात सध्या तरी जनावरांसाठी चारा उपलब्ध असून कुठेही चाऱ्याचं संकट नसल्याचं प्रशासनानं म्हटलं आहे.

भौगोलिक दृष्ट्या बुलढाणा जिल्ह्याचे दोन भाग आहेत. एक म्हणजे घाटावरील भाग आणि दुसरा म्हणजे घाटाखालील भाग. यावर्षी घाटावरील सात तालुक्यात पाणीटंचाईचं संकट मोठं झालं आहे. बुलढाणा, चिखली, देऊळगाव राजा, सिंदखेड राजा, लोणार आणि मेहकर या तालुक्यातील अनेक गावात भीषण पाणीटंचाई उद्भवली आहे.

बुलढाणा शहरात भीषण पाणी टंचाई भासत आहे. ग्रामीण भागात प्रशासनाने असंख्य गावांना टँकरद्वारे पाणीपुरवठा सुरू केला आहे. तर घाटाखालील मलकापूर, नांदुरा, खामगाव शेगाव जळगाव जामोद, संग्रामपूर येथे सुद्धा पाणी टंचाई भासत आहे.