बुलढाणा : बुलढाणा जिल्ह्यातील शेगाव तालुक्यातील अनेक गावात गेल्या दोन महिन्यापासून केस गळतीने नागरिक हैराण आहेत. मात्र सदरची केस गळती नेमकी कशामुळे होत आहे. याचे कारण अजूनही गुलदस्त्यात आहे. कारण केस गळतीनंतर आयसीएमआरने येथून काही नमुने तपासणीसाठी नेले होते. मात्र या संदर्भातील अहवाल अद्याप प्राप्त झालेला नसल्याने कारण अस्पष्ट आहे.  

बुलढाणा जिल्ह्यातील शेगाव तालुक्यात अनेक गावांमध्ये केस गळती होत आहे. अचानक झालेल्या केस गळती प्रकरणाने आरोग्य प्रशासन हा ढवळून निघाले होते. तात्काळ आयसीएमआरचे पथकही या भागात तपासणीसाठी दाखल झाले होते. आयसीएमआरच्या पथकाने दोन वेळेस या परिसरातील केस गळती रुग्णांचे व परिसरातील इतर वस्तूंचे नमुने तपासणीसाठी नेले. मात्र अद्यापही दोन महिने उलटूनही आयसीएमआरचा अहवाल उघड न झाल्यामुळे परिसरात आश्चर्य व्यक्त होत आहे. 

अहवाल आल्यास कारण येणार समोर 

अचानक होत असलेल्या केस गळतीमुळे शेगाव तालुक्यात खळबळ उडाली होती. मध्यंतरी केंद्रीय आरोग्य राज्यमंत्र्यांनी या परिसरातील केस गळती रुग्णांच्या रक्तात सेलेनियमचे प्रमाण लक्षणीय वाढल्याचे म्हटले होते. मात्र अद्यापही आयसीएमआरचा अहवाल उघड न केल्याने या परिसरातील नागरिक भयभीत असून अनेक जण साशंक आहेत. यामुळे अहवाल लवकर आल्यास केस गळतीचे कारण समोर येऊन त्यावर उपाय करता येतील. 

प्रशासनाकडून लपवाछपवी 

जिल्हा प्रशासनही याबाबत गंभीर नसून आयसीएमआरच्या अहवालाबाबत जिल्हाधिकारी लपवाछपवी करत असल्याचं समोर येत आहे. त्यामुळे आयसीएमआर फक्त फार्स तर नाही ना? परिसरातील नागरिकांच्या आरोग्याची खेळल तर जात नाही ना? असे प्रश्न आता उपस्थित होत आहेत.