बुलढाणा : बदलापूर येथील एका नामांकित शाळेत दोन चिमूरड्यांवर झालेल्या लैंगिक अत्याचाराच्या पार्श्वभूमीवर बुलढाणा जिल्हा पोलीस प्रशासन अलर्ट मोडवर आलं आहे. त्या अनुषंगाने जिल्ह्यातील सर्व शाळांमधील शिक्षकेतर कर्मचारी, शिपाई यांची चारित्र्य तपासणी करण्याबाबतचा निर्णय पोलीस प्रशासनाकडून घेण्यात आला आहे.

बदलापूर (Badlapur) येथे शाळेतील कर्मचाऱ्यानेच चार वर्षीय दोन मुलींवर अत्याचार केल्याची घटना घडली आहे. या घटनेनंतर सर्वत्र संतापाची लाट आहे. शाळांमध्ये असे प्रकार होऊ नयेत म्हणून पोलीस प्रशासन देखील आता अलर्ट मोडवर आले असून याच अनुषंगाने (Buldhana) बुलढाणा पोलीस प्रशासनाकडून निर्णय घेण्यात आला आहे. याबाबत जिल्हा पोलीस अधीक्षक सुनील कडासने यांनी सर्व पोलीस स्थानकांना तशा सूचना देखील दिल्या आहेत.

रेकॉर्ड ठेवणार पोलीस स्टेशनमध्ये 

पोलीस (Police) प्रशासनाच्या निर्णयानुसार बुलढाणा जिल्ह्यातील सर्व खाजगी, सरकारी शाळेतील शिक्षकेतर कर्मचारी यात सफाई कामगार, वाहन चालक, स्कूल बस चालक इत्यादी कर्मचाऱ्यांचे एका समितीद्वारे चारित्र्य तपासणी होणार आहे. या सर्व कर्मचाऱ्यांचे रेकॉर्ड स्थानिक पोलीस स्टेशनला तयार करण्यात येणार आहे. ज्यामुळे एखादी घटना घडल्यास अशा आरोपींना शोधून काढणे सोयीचे होणार आहे.