बुलढाणा : गरजू व्यक्तींना माफक दरांमध्ये चांगले भोजन मिळावे; या हेतूने शिवभोजन केंद्र सुरु करण्यात आले आहेत. मात्र या शिवभोजन केंद्रातील जेवणामध्ये अळ्या आढळल्याचा किळसवाणा आणि धक्कादायक प्रकार बुलढाण्याच्या खामगावमध्ये समोर आला आहे, उपजिल्हा सामान्य रुग्णालयाच्या परिसरात शिवभजन केंद्रामध्ये हा संपूर्ण प्रकार उघडकिस आला आहे. 

शिवभोजन थाळी माफक दरात उपलब्ध करून दिली जात असते. यात एवढ्या दहा रुपयात पोटभरून जेवण गरिबांना मिळत असते. शासनाने हि शिवभोजन थाळी केंद्र सुरु केली आहे. मात्र अशा पद्धतीने नागरिकांनी घेतलेले जेवण निकृष्ट दर्जाचे दिले जात असल्याचे समोर आले आहे. यामुळे शिव भोजन केंद्रामधून दिल्या जाणाऱ्या जेवणाच्या दर्जेबाबत संताप व्यक्त केला जात असून अन्न व औषध प्रशासनाने तात्काळ कारवाई करण्याची मागणी केली जात आहे.

वरण आणि भाजीमध्ये अळ्या 

बुलढाणा जिल्ह्यातील खामगांव येथील उपसामान्य रुग्णालयाच्या बाजूला शिवभोजन केंद्र सुरु आहे. या केंद्रावरील देण्यात येणाऱ्या थाळीमध्ये अळ्या निघाल्याचा व्हिडिओ समोर आला आहे. खामगाव येथील उपजिल्हा सामान्य रुग्णालयाच्या बाजूला असलेल्या शिव भोजन केंद्राच्या माध्यमातून ग्राहकांना जी थाळी दिली जाते. अन्नामधील वरण व भाजीमध्ये मृत अळ्या असल्याचा किळसवाणा प्रकार समोर आला आहे. या धक्कादायक प्रकारामुळे चांगलीच खळबळ उडाली आहे.

प्रशासन काय करणार कारवाई 

अशा प्रकारे गलिच्छ भोजन देत असल्याने एक प्रकारे गरिबांची थट्टाच उडवली जात आहे. या शिवभोजन थाळी केंद्र चालकांवर काय कारवाई केली जाणार याकडे सर्वांचे लक्ष लागले आहे. दरम्यान या संदर्भात अन्न व प्रशासन विभाग काय कारवाई करते हे येणाऱ्या काही काळात स्पष्ट होईल. मात्र हा व्हिडीओ समोर आल्याने या मोहिमेसंदर्भात शंका उपस्थित केली जाऊ लागली आहे.