Summary:

• आज जळगाव सराफा बाजारात सोनं-चांदी दरात मोठी घसरण

• आजचा २४ कॅरेट २२ कॅरेट आणि १८ कॅरेट सोनं झालं स्वस्त

• चांदीच्या दरात देखील मोठी घसरण

• १ किलो चांदी ४००० रुपयांनी स्वस्त

संजय महाजन, जळगाव

आखाती देशांमध्ये सुरू असलेल्या युद्धाचा परिणाम सोनं-चांदीच्या दरावर देखील होताना दिसत आहे. दोन आठवड्यांपेक्षा जास्त कालावधी झाला तरी देखील युद्ध थांबेना. या युद्धामुळे इंधनाचा तुटवडा निर्माण झाला असून दर वाढले, तर दुसरीकडे युद्धादरम्यान सोनं-चांदीच्या दरात चढ-उतार होत आहे. आज आठवड्याच्या पहिल्या दिवशी सोनं आणि चांदीच्या दरात मोठी घसरण झाली आहे. त्यामुळे ग्राहकांमध्ये आनंदाचे वातावरण आहे. पण आज सोनं-चांदी खरेदी करायला जाण्यापूर्वी आजचे दर किती आहेत ते जाणून घ्या....

सुवर्णनगरी म्हणून ओळखल्या जाणाऱ्या जळगावच्या सराफा बाजारात आज सोनं-चांदीच्या दरात मोठी घसरण झाली आहे. सोन्याचे दर १००० रुपयांची तर चांदीचे दर ४००० रुपयांनी स्वस्त झाले. आज सराफा बाजारात सोन्याचे दर जीएसटीसह १ लाख ६१ हजार १९५ रुपये इतके आहे. तर १ किलो चांदीचे दर जीएसटीसह २ लाख ६३ हजार ६८० रुपयांवर गेले आहे. सोनं-चांदीच्या दरात घसरण झाल्यामुळे सराफा बाजारात सोनं खरेदीसाठी ग्राहकांनी गर्दी केली आहे.

तर, गुड रिटर्न्सने दिलेल्या माहितीनुसार, आज सोनं-चांदीच्या दरात घसरण झाली. २४ कॅरेटच्या १ तोळा सोन्याच्या दरामध्ये ४९० रुपयांनी घसरण झाली असून हे सोनं १,५९,१७० रुपयांना विकले जात आहे. २२ कॅरेटच्या १ तोळा सोन्याच्या दरात ४५० रुपयांनी घसरण झाली असून हे सोनं १,४५,९०० रुपयांना विकले जात आहे. तर १८ कॅरेटच्या १ तोळा सोन्याच्या दरात ३६० रुपयांनी घसरण झाली असून हे सोनं १,१९,३८० रुपयांना विकले जात आहे. तर आज १ किलो चांदीच्या दरात ५००० रुपयांनी घसरण झाली असून त्याची किंमत २,७०,००० रुपये इतकी आहे.